“Зеленая энергия” Саха сирин хампаанньата аармыйаҕа 350 электроматасыыкылы биэрдэ

“Якутия” ТОР резиденэ, “Уһук Илин сулуһа” VII сыл аайы ыытыллар уопсастыбаннай-дьыалабыай бириэмийэ  “Барыта кыайыы туһугар” номинациятын кыайыылааҕа “Зеленая энергия”  РФ Сэбилэниилээх Күүстэригэр 2024 сылтан “Тимир Ат” диэн 350 электроматасыыкылы биэрдэ.

“Инники кирбиигэ Уһук Илинтэн сылдьар, Ийэ дойдуларын уонна Арассыыйа саҥа эрэгийиэннэрин көмүскүүр уолаттарбытыгар Саха сиригэр оҥоһуллубут электроматасыыкыллары биэрбиппит. Бу тэрил штурмалыыр бөлөхтөргө олус туһалаата. Тэрилтэни бу киллэрбит көмөтүн иһин  “Уһук Илин сулуһа” бириэмийэ “Барыта кыайыы туһугар” номинациятынан наҕараадалаабыппыт. Биһиги “Патриотическая” ТОР көмөтүнэн технологиялары салгыы сайыннарыахпыт уонна инники кирбиигэ уолаттарбытыгар көмөлөһүөхпүт”, — диэтэ Юрий Трутнев.

Саха сирин тэрилтэтэ айбыт тиэхиньикэтэ тепловизордарга көстүбэт уонна бааһырбыт дьону таһаарарга, сиринэн разведкаҕа сылдьааччыларга  көмөлөһөр.

Саха сирэ байыаннай дьайыы саҕаланыаҕыттан үгүс ахсааннаах тырааныспары уонна дроннары ыытта. “Якт-Сокол” квадроцикллары , “Тимир Ат” электроматасыыкыллары тэҥэ тепловизордары, түүн көрөр прибордары, сибээс тэриллэрин уо.д.а. ыыттылар.

2022 с. СВО кыттыылаахтарын өйүүргэ Биир кэлим түмэр киин тэриллибитэ. 2024 сыллаахха “Вместе к Победе!” өрөспүүбүлүкэтээҕи хамыыһыйа тэриллэн, Ил Дархан Айсен Николаев тус бэйэтинэн дьаһайар.

Саха Өрөспүүбүлүкэтин Ил Дарханын  уонна Саха Өрөспүүбүлүкэтин Бырабыыталыстыбатын пресс-сулууспата