«Зеленые пионеры» үбүлүөйдээх сүлүөт саҕаланна

«Бэс чагда» («Сосновый бор») оҕолору сынньатар уонна чэбдигирдэр кииҥҥэ «Зеленые пионеры Якутии» өрөспүүбүлүкэтээҕи 9 сүлүөт саҕаланна.

«Планетаны харыстаа!» симиэнэ чэрчитинэн ыытыллар тэрээһиҥҥэ өрөспүүбүлүкэ 20 улууһуттан 130-ча эдэр эколог, ол иһигэр байыаннай дьайыы кыттыылаахтарын дьиэ кэргэннэриттэн 30 оҕо, муһунна.  Эдэр экологтар хамсааһыннарын, үгэс курдук,  Саха сирин АЛРОСА алмаастаах хампаанньата  өйүүр уонна үбүлүүр.
Сүлүөт бырагырааматыгар экология араас тэрээһиннэрэ: лиэксийэлэр, квизтэр, квестар, экология бырайыактарын көмүскээһин уонна маастар-кылаастар киирэллэр.
«Үөрэх бырагырааматын сэргэ, араас аралдьытар бырагыраама элбэх. Оҕолор симиэнэ кэмигэр Саха сирин экологияҕа миниистирин кытары көрсөр уонна кэпсэтэр кыахтаналлар.
Ону таһынан ураты болҕомто патриоттыы тыыҥҥа иитиллиигэ ууруллар. Быйыл оҕолор байыаннай дьайыы кыттыылаахтарыгар экология өттүнэн ыраас матырыйааллартан араас оҥоһуктары бэлэмниэхтэрэ. Биһиги инникитин  биир идэлээхтэрбитинэн буолуохтаах дьону бэлэмниибит», — диэн Дьаһалта салалтатын, экологияҕа  сырдатыытын уонна айылҕа ураты харыстанар сирдэрин департаменын  сүрүн исписэлииһэ Ньургуйаана Гуринова кэпсээтэ.

Кини кэпсээбитинэн, сүлүөт кыттыылаахтарын Саха сирин сэдэх уонна сүтэн эрэр көтөрдөрүн, кыылларын аатынан: «Ньургуһуннар», «Туруйалар», «Барсы», «Лилиялар» диэн түөрт этэрээккэ араарбыттар.
«Үбүлүөйдээх сүлүөккҥэ өрөспүүбүлүкэ 20 улууһуттан 130-ча эдэр эколог кэллэ. Үгүс оҕо биһиэхэ иккис-үһүс сырыытын кэлэр. Кинилэр уһун сынньалаҥнарын бэһиэлэйдик уонна туһалаахтык атаараары сайыны олус күүтэллэр», – диэн Ньургуйаана Гуринова тоһоҕолоон бэлиэтиир.
АЛРОСА Саха сирин судаарыстыбаннай былааһын уорганнарын кытары үлэҕэ отделын начаалынньыгын солбуйааччы Анатолий Бравин тулалыыр эйгэҕэ харыстабыллаах сыһыан суолтатын маннык быһаарда:
«АЛРОСА хампаанньаҕа Саха сирэ – хампаанньа баар эрэгийиэнэ эрэ буолбатах, ону таһынан биһиги дойдубут. Ол иһин,  экология бырайыактарыгар инвестициялар – төрөөбүт дойдуга тапталы уонна үүнэр көлүөнэҕэ кыһамньыны кэрэһилиир сөптөөх быһаарыныы».
Кини ону таһынан айылҕаны харыстыырга уонна экологияҕа куттал суох буоларын хааччыйарга биисинэс, судаарыстыба уонна уопсастыба күүһүн холбуур наадатын ыйда.
АЛРОСА айылҕа харыстабылын уонна экологияҕа куттал суох буолуутун боппуруостарыгар куруук улахан болҕомтотун уурар. Бу сыалга-сорукка хампаанньа сыл аайы 10 миллиартан тахса суумалаах үбү көрөр. Хампаанньа өйүүр бырайыактарыттан биирдэстэринэн буолар «Зеленые пионеры Якутии» сүлүөккэ оҕолор тулалыыр эйгэни таптыырга уонна эппиэтинэстээхтик сыһыаннаһарга үөрэнэллэр.

Санатан эттэххэ, тэрээһин экологияны билии уонна экология култууратын, тулалыыр эйгэҕэ харыстабылаах сыһыан таһымнарын үрдэтиигэ ананар. «Зеленые пионеры Якутии» хамсааһын 2017 сыллаахха «Зеленые пионеры» Бүтүн Арассыыйатааҕы хамсааһын чэрчитинэн Экология сылыгар тэриллибитэ.
Сүлүөтү «Бэс чагда», «Бастакылар хамсааһыннара» уонна АЛРОСА хампаанньа тэрийэллэр. Сүлүөт түмүгүнэн кыттааччылар Экология министиэристибэтин сэртипикээттэрин, онтон куонкурустар кыайыылаахтара дипломнары ылаллар.

Мария ГОРОХОВА суруйуутуттан тылбаас