«Земскэй суруналыыс» бырагырааманы үлэлэтэргэ этии киллэрдилэр

Арассыыйа Суруналыыстарын сойууһа «Земскэй суруналыыс» диэн бырагырааманы үлэлэтэргэ ыҥырда. Бу туһунан Арассыыйа Суруналыыстарын сойууһун бэрэссэдээтэлэ Владимир Соловьев «РИА-Новости» ааҕыныстыбаҕа иһитиннэрдэ.

Кини этэринэн, билигин тыа сиригэр,  оройуон хаһыаттарыгар каадырдар тиийбэттэр. Хамнаһа кыра диэн, эдэр дьон талаһа сатаабаттар. Владимир Соловьев этэринэн, тыа сирин сайыннарыахха, ыччат олохсуйарын ситиһиэххэ наада.

Билигин «Земскэй быраас», «Земскэй култуура үлэһитэ» бырагыраамалар ситиһиилээхтик үлэлии тураллар. Бу курдук «Земскэй суруналыыс» бырагыраама  үлэлээтэҕинэ,  суруналыыстыкаҕа эдэр каадырдары сыһыарарга, тыа сирин сайыннарарга биир олук ууруллуох этэ.

Бу маннык судаарыстыбаннай бырагыраама көмөтүнэн, эдэр суруналыыстар дьиэ атыылаһан, тыа сиригэр олохсуйуохтарын сөп.