Үөрэх уонна билим министиэристибэтэ тохсунньу 10 күнүттэн быйылгы кубуотанан “Земскэй учуутал” бырагыраамаҕа сайаапкалары ылан саҕалаабыта. Бырагыраама 50 тыһ. кыра нэһилиэнньэлээх тыа оскуолаларын, оробуочай бөһүөлэктэри, кыра куораттары учууталынан хааччыйар соруктаах диэн “Саха” НКИХ “Эйгэ” биэрииитин ыалдьыттара иһитиннэрэллэр.
СӨ Үөрэҕи сайыннарар уонна идэ таһымын үрдэтэр институт идэлээх маастарыстыбаны үрдэтэр киинин салайааччыта Динаида Абрамова: “Арасссыыйа министиэристибэтинэн сыл аайы кубуота көрүллэр. Ол кубуотанан өрөспүүбүлүкэтээҕи Үөрэх уонна билим министиэристибэтэ оскуолалары талар. Вакансия төһө кэм устата баарын, ханнык биридимиэт учууталыгар наадыйалларын ырытан, үөрэтэн баран оскуолалары талаллар.
Биэс сыл устата биһиэхэ 67 учуутал кэлэн үлэлии сылдьар. Ол иһигэр 40 учуутал атын эрэгийиэнтэн. Бу учууталлар ортолоругар 35 сааһын туола илик 13 эдэр учуутал бырагыраамаҕа киирэн үлэлии сылдьар. Бастакынан Арктика, хоту улуустар оскуолаларын учууталларынан хааччыйар соруктаахпыт.
Ордук математика, нуучча тылын учууталлара ирдэнэллэр. Былырыын тустаах бырагырааманан 22 учуутал үлэлии кэлбитэ. Кыра кэмпилиэктээх оскуолаларга физика-математика, информатика-математика, физика-информатика курдук иккилии биридимиэти үөрэтэр учууталлар наадалар”, — диэн кэпсиир.
Ирдэбил быһыытынан бырагыраамаҕа 55-гэр диэри саастаах, үрдүк эбэтэр орто анал үөрэхтээх, квалификациялаах учууталлар кытталлар. Ону таһынан, үөрэнээччилэрэ олимпиадаларга төһө кытталларын көрөллөр, эдэр учууталлар кэлэллэрэ биһирэнэр.
“Земскэй учуутал” федеральнай бырагыраама эрэгийиэннээҕи сүрүннээччитэ Сардаана Данилова иһитиннэрбиттэринэн, быйыл барыта 17 вакансия көрүллүбүт, ордук физика уонна математика учууталларыгар наадыйаллар эбит. Тохсунньу 23 күнүнээҕи туругунан барыта 47 сайаапка киирбит, сайаапканы муус устар 15 күнүгэр диэри ылаллар.
Онон “Земскэй учуутал” бырагырааманан тыа сиригэр баран үлэлиэн баҕалаахтар тиэтэйэргит ирдэнэр. Кэлин киин, илин эҥэр улуустар нэһилиэктэрин оскуолаларыгар эмиэ кубуота көрүллэр буолла. Вакансиялары сиһилии “Земскэй учуутал” https://iroipk-sakha.ru/559880/ федеральнай порталыга көрүөххүтүн, докумуоннаргытын СӨ Үөрэҕи сайыннарар уонна идэ таһымын үрдэтэр институкка 117 хоско (Дьокуускай к. Ленин проспегын 3-с нүөмэрдээх дьиэтэ) аҕалыаххытын сөп.
Ханна баҕарар түмсүү элбэҕи быһаарар. Ону билэр буоланнар, дүпсүннэр (баһылык Сивцев Николай Николаевич) нэһилиэктэрин иһигэр…
Уус Алдан улууһугар Найахыга "Саллаат аартыга" ытык миэстэ СӨ Ил Дархан гранын өйөбүлүнэн саҥардылынна. Бу …
Ыам ыйыгар төрөөбүттэр. Бэлиэлэрэ - чаҕылҕан. Эр киһи Дуоспуруннаах, туохха барытыгар дьоҕурдаах, дириҥ өйдөөх, үтүө…
Владивостокка "Это у нас семейное" күөн күрэс уокуруктааҕы полуфинала саҕаланна. Манна Уһук Илин уокуругуттан дьиэ…
Өрүс барар кэмигэр айан-сырыы кутталланар. Дьиҥэ, кыра кыһалҕалаах киһи айаннаабата да ордук буолуоҕа. Ол эрээри…
Успуорка сыһыаннааҕы төһө сэргиигин? Маны билэҕин дуо? Сахалыы оонньуу, дьарык арааһын Үөһээ Дьааҥыга 1867-1876 сс.…