«Земскэй учуутал» бырагырааманан 89 педагог үлэлиир

Саха сиригэр «Земскэй учуутал» федеральнай бырагырааманан биирдэ бэриллэр төлөбүрү ыларга куонкурус салҕанар. Билигин кыттыан баҕалаах учууталлартан докумуоннары туталлар. 

Бу бырагырааманан тыа сиригэр үлэлии барбыт учууталларга 2 мөлүйүөн солкуобай төлөнөр. Бырагыраама 5 сыл үлэлээбитин тухары 89 учууталга төлөннө, кэлэр үөрэх дьылыгар өссө 11 миэстэ баар.

2025 сыл муус устар 15 күнүгэр диэри сайаапкалары федеральнай порталга: http://zemteacher.edu.ru/ туталлар. Докумуоннар куоппуйаларын булгуччу эрэгийиэннээҕи операторга «Институт развития образования и науки Республики Саха (Якутия) им. С.Н. Донского-II» электроннай буостаҕа ыытыллыахтаа: yakutiazemteacher@mail.ru.

Туох баар ыйытыыларынан үөрэх министиэристибэтин каадыр бэлиитикэтигэр, судаарыстыбаннай сулууспаҕа, юридическэй хааччыйыыга отделыгар уонна үөрэҕи сайыннарыы, квалификацияны үрдэтии институтугар эрийэн, билсиэххэ сөп.

2025 сыл тохсунньу 1 күнүттэн «Земскэй учуутал» бырагыраама «Ыччат уонна оҕолор» саҥа национальнай бырайыак «Педагогтар уонна настаабынньыктар» федеральнай бырайыагын иһинэн үлэлиир буолла.