«Земскэй учуутал» бырагырааманан өссө 11 учуутал тыа сирин оскуолаларыгар үлэлии барыаҕа

«Земскэй учуутал»  бырагырааманан   тыа сирин оскуолаларыгар бу сылга өссө 11  педагог үлэлии барыаҕа. Бу туһунан Үөрэх уонна билим министиэристибэтэ иһитиннэрэр.

Бырагыраама усулуобуйатынан 50 тыһ. диэри нэһилиэнньэлээх бөһүөлэккэ эбэтэр куоракка үлэлии кэлбит учууталга биирдэ бэриллэр 1 мөл. солк. толуйуу төлөбүр көрүллэр, Уһук Илин федеральнай уокурукка үлэлии кэлээччилэргэ 2 мөл. солк. төлөнөр.
Тохсунньу 10 күнүттэн хандьыдааттартан докумуоннары хомуйуу саҕаламмыта. Ол кэннэ куонкурус быһыытынан бырагыраама кыттыылаахтарын талыахтара.

Федеральнай бырагыраама кыттыылаахтара этэллэринэн, туһааннаах бырагыраама  олорор дьиэ-уот боппуруоһун быһаарыыга судаарыстыбаттан өйөбүл ыларга кыаҕы биэрэр. Бу туһунан Анаабыр улууһун  Сааскылаах оскуолатын аангылыйа тылын учуутала Майя Антипина  этэр.  Кини биир кэмнээх төлөбүрүнэн ипотекатын төлөөбүт.

Куонкуруска кыттааччылар докумуоннарын “Земскэй учуутал” федеральнай портал https://zemteacher.apkpro.ru/ (Банк вакансий – выбрать регион – подать заявку) нөҥүө туталлар.