Жатай устудьуона «Профессионаллар» чөмпүйэнээт финалыгар Саха сирин чиэһин көмүскүөҕэ

 Сэтинньи 29 күнүгэр Санкт-Петербург куоракка «Профессионаллар» диэн профессиональнай маастарыстыба Бүтүн Арассыыйатааҕы чөмпүйэнээтин финала саҕаланар.

Кыттааччылар орто саастаах категорияҕа 27 компетенциянан, оттон «Юниордар» категорияҕа 3 компетенциянан бэйэлэрин сатабылларын көрдөрүөхтэрэ. Бу туһунан Өрөспүүбүлүкэтээҕи профессиональнай үөрэхтээһин сайдыытын институтун редакциялыыр-таһаарар киинэ иһитиннэрэр. Чөмпүйэнээт Арассыыйа эрэгийиэннэриттэн уонна доҕордуу дойдулартан 700-тэн тахса кыттааччыны «Үөрэхтээһин», «Өҥө», «Оҥорон таһаарыы» уонна «Инженернэй технологиялар» диэн түөрт хайысханан түмүөҕэ.

«Уу тырааныспарын суудуналарын туһаныы» компетенцияҕа Саха сириттэн Жатайдааҕы тиэхиньикум үһүс кууруһун устудьуона Валерий Шамаев кыттыаҕа. Валерий «Суудунаны ыытыы» идэтигэр үөрэнэр уонна бу идэни карьераҕа үүнэр суола чуолкай уонна көстөн турарынан талбытын билинэр — көмөлөһөөччүттэн саҕалаан суудуна хапытааныгар тиийэ.

«”Профессионаллар” чөмпүйэнээттэрин хамсааһынын туһунан аан бастаан уһуйааччыбыттан истибитим. Кини биһиги бөлөхпүтүн мунньан, дьиҥнээх идэ усулуобуйатыгар бэйэ сатабылын тургутан көрөр кыах баарын туһунан кэпсээбитэ. Мин ону тута сэргээбитим. Мин настаабынньыгым Владислав Евгеньевич Яковлев буолар. Финалга олус кыһаллан бэлэмнэнним — күн аайы 6 чаас устата тренажерга суудунаны салайарга эрчилинним, бастакы көмөнү оҥорор ньымаларбын чочуйдум. Тугу сатыырбын барытын көрдөрөр санаалаахпын», – диэн Валерий кэпсиир.

Финал кэмигэр кыттааччыларга киэҥ ис хоһоонноох дьыалабыай, идэҕэ туһаайар уонна култуурунай бырагыраама былааннанна. Кыайыылаахтары уонна призердары наҕараадалыыр үөрүүлээх сиэр-туом ахсынньы 4 күнүгэр буолуоҕа.

Санатан эттэххэ, быйыл ыам ыйыгар Нижний Новгородка креативнай индустрия уонна IT эйгэтигэр компетенциялар чөмпүйэнээттэрин финала ыытыллыбыта. Онно Саха сириттэн кыттыбыт «Айар уустар» креативнай индустриялар кэллиэстэрин выпускнига Жанна Жиркова «Звукорежиссура» компетенцияҕа боруонса призерунан буолбута.