Жатайдааҕы собуокка тыа сиригэр наадалаах паромнары, дебаркадердары, дьоҕус муосталары оҥоруохтара

Тыа сирдэрэ, хаһаайыстыбалар Жатайдааҕы суудунаны оҥорор собуот үлэҕэ киирэрин кэтэһэллэр. Манна тыа сиригэр наадалаах паромнары, дебаркадердары, дьоҕус муосталары оҥоруохтаахтар. Ол эрээри ону атыылаһарга үп-харчы тиийбэтэ мэһэйдиир.

“Ол иһин Ил Дархан сорудаҕынан Тыа хаһаайыстыбатын министиэристибэтэ итинник дьоҕус паромнары тутарга, балыктыыр устар тэриллэри оҥорорго судаарыстыбаннай өйөбүлү көрөр барыйааннары оҥоруохтаах,” — диэтэ “Жатайдааҕы судоверфь” дириэктэрэ Влад Пермяков.  – Улуустар үбүлээһин аҥара көрүллэр буоллаҕына, бары да сакаастыырга бэлэмнэр. Сунтаардар оттуур сирдэрэ үксэ өрүс уҥуор баар, ол иһин тиэхиньикэлэрин туоратар паромҥа наадыйан бастакынан сакаастаабыттара.

Аны өрүспүт тырааныспара үксэ сэбиэскэй кэмнээҕи оҥоһуу.  Билигин бары туһаныллыбыттара 40 сылтан таҕыста. Онон өссө 20 сыл тугу да дьаһаммакка олордохпутуна, биир да өрүс тырааныспара суох хаалар кутталлаахпыт. Ол иһин РФ бырабыыталыстыбата суудуналары бас билээччилэри өйөөҥ диэн сорудаҕа баар”.

Өрүс тырааныспарын, устар тэриллэри таһынан Жатайдааҕы собуокка тыа нэһилиэктэрин өссө биир тыын дьыалалара – түргэнник тутуллар муосталар оҥоһуллуохтаахтар.

-Итинник түргэнник оҥоһуллар САРМ муостаҕа бастакы сакаас Чурапчыттан киирбитэ, — диир тырааныспар миниистирин солбуйааччы Семен Коркин. — Тырааныспар министиэристибэтигэр суол пуондатыгар сыл аайы 100 мөл. солк. көрүллэр. Массыына суолларын управлениетын нөҥүө торги оҥорон, улуустарга 5-6 муостаны сыл аайы оҥоробут.  Холобур, былырыын муосталары  “Восход” собуот туппута, ол иннинэ иркутскайдар тута сылдьыбыттара. Оттон билигин бу собуотунан туттарыахпыт. Кыра муосталар сыаналара 13-15-20 мөл. солк. буолар.

Дебаркадердар, паромнар наһаа наадалар. Быйыл Жигалово үс дебаркадеры тутта – аныгы нэдиэлэҕэ Бэстээххэ туруоруохпут, өссө биири Өлүөнэ очуостарыгар, биири — Сангаарга.

Ону таһынан бетон причаллары оҥороору, кэллиэгэлэрбит уопуттарын үөрэтэ сылдьабыт.