Жатайдааҕы техникум: «Үгэстэри харыстыыбыт, саҥаны киллэрэбит”

Алтынньы 29 күнүгэр  Жатайдааҕы техникум лиэтэпиһигэр хаалар үйэлээх түгэн буолла. Биһиги дэҥҥэ көстөр арт-эбийиэги уонна инникитин устудьуоннарбыт үөрэниэхтээх баазаларын – уһулуччулаах төрүттээччи аатын ылбыт суудунаны арыйдыбыт.

Бу күн көлүөнэлэр утумнааһыннарын уонна үгэстэри харыстааһын тыыннаах туоһутунан буолла.  Номоххо киирбит киһи, бастакы дириэктэр Павел Григорьевич Касьянов аата техникум 70 сылынан суудунаҕа иҥэрилиннэ. 70 сыл анараа өттүгэр алтынньы 29 күнүгэр биһиги үөрэхпит тэрилтэтин тирэҕэ ууруллубута.

Мантан ыла суудуна көннөрү тимир уонна конструкция буолбатах. Бу – билиигэ дьулуур бэлиэтэ, эдэр дьону патриоттуу иитии киинэ уонна биһиги ыччаппыт киэн туттуута.

Тэрээһин үөрүүлээх сиэрэ-туома Арассыыйа уонна Саха сирин  Өрөгөйүн ырыаларын доҕуһуолунан, Арассыыйа былааҕын  өрө көтөҕүүнэн саҕаланна.

Үөрүүлээх тэрээһиҥҥэ Павел Григорьевич Касьянов уолаттара  Сергей, Владимир уонна  Андрей Павловичтар, сиэнэ  Павел Владимирович, техникум дириэктэрэ  Владимир Иванович Тихонов,  Жатайдааҕы суудунаны өрөмүөннүүр  собуот идэлээх сойууһун бэрэссэдээтэлэ Алексей Павлович Кучумов, Жатайдааҕы суудунаны өрөмүөннүүр  собуот дириэктэрэ Артем Юрьевич Якимович,  «Жатайдааҕы судоверфь» АУо дириэктэрин солбуйааччы Дмитрий Максимович Пермяков,  «ЛОРП» ПАУо суудуна хапытаана Григорий Ионович Игнатьев,  педагогическай үлэ бэтэрээнэ Валерий Петрович Мамонтов,  “Жатай” куорат уокуругун култуураҕа, успуорка уонна дьиэ кэргэн бэлиитикэтигэр отдел начаалынньыга Марина Андреевна Левина  кытыннылар.

Жатайдааҕы техникум дириэктэрэ Владимир Тихонов эҕэрдэ тылыгар  киэҥ хабааннаах улахан бырайыагы олоххо киллэриигэ кыттыбыттарга: суудунаны тиэйэргэ-аҕаларга көмөлөспүт бииргэ үлэлэһээччилэригэр, саҥардыы үлэтин ыыппыт үөрэх маастардарыгар уонна устудьуоннарга, бу бырайыакка дууһаларын ууран туран үлэлээбиттэргэ барыларыгар махтанна.

Суудунаны “сырдатыы” сиэрин-туомун ыыппыт Дьокуускайдааҕы Епархияттан протоиерей Павел Слепцов ураты тыыны биэрдэ.

Павел Касьянов аатынан суудуна талааннаах устудьуоннар тардыһар кииннэринэн, техникум сайдыытын саҥа кэрдиис кэминэн, төрүттээччилэргэ тыыннаах пааматынньыгынан уонна  Жатай бөһүөлэгэр биллэр-көстөр бэлиэ эбийиэгинэн буоларыгар эрэллээхпит.

Жатайдааҕы техникум пресс-сулууспата