Жатайга аарыма собуот үлэҕэ киирээри турар

Жатайга суудунаны оҥорор аарыма собуот бастакы уочарата быйыл үлэҕэ киирээри, 90 % бүтэн турар.

Манна саамай улааппыта 130 м уһуннаах “река-море” таһаҕаһы таһар суудунаны оҥорон таһаарыахтаахтар. Хас да блоктарынан чаас-чаас оҥорон баран, бүтэһик блокка аҕалан холбоон кэбиһэллэр. Үчүгэйэ диэн кыһыннары кытта үлэлиир.

“Манна Өлүөнэнэн таһаҕаһы таһар суудуналары оҥоруохпут, — диир “Жатайдааҥы судоверфь” АУо  дириэктэрэ Влад Пермяков. – Туризм сайдан, сакаас киирдэҕинэ дьону таһар суудуналары оҥорор буолуохпут. Билигин сүрүн сакаасчыппыт ЛОРП.  “Река-море” кылаастаах трюмнаах таһаҕас тиэйэр баарсалары оҥорууга, Сөбүлэһиигэ илии баттаабыппыт. Толору ноҕоруусканан биир сылга 10 “река-море” суудунаны тэҥинэн оҥоруохпутун сөп. Туоннанан ыллахха, 10 тыһ. туонна тимири сылга туттуохпутун сөп. Билиҥҥитэ бэйэбит бырайыактыыр конструкторскай бюробут суох, ол иһин сакаастыыбыт. Оттон бырайыак элбээн бардаҕына, бэйэбит конструкторскай бюроланыахпыт, хонтуруоллуур нуорма, о.д.а. барыта баар буолуоҕа. Онон билигин инвестиционнай түһүмэх уонна оҥорон таһаарыы ыккардыгар сылдьабыт”.

Хараабыл куорпуһун тутар тимир илиистэри тимир суолунан тиэйэн аҕалаллар. Ис өттүн тээбиринэ эмиэ барыта тастан аҕалыллар. Дьэ ол кэннэ 8х2 эбэтэр 6х1,5 м. тимир лиистэри манна сыахтарга имитэн-хомутан, быһан-сотон, иэҕэн, сыалай хараабыл куорпуһун тутан таһаарыахтаахтар, ол кэннэ ис өттүн таҥыахтаахтар. Ону иэҕэр, быһар-сотор оборудование бүүс бүтүннүү сыахтарга кэлэн турар.

Үбүлээһин көрүлүннэҕинэ иккис уочарат тутуллуохтаах. Онно сүрүннээн өрөмүөн үлэтэ барыахтаах. Суудуналары таһынан собуот паромнары, дебаркадердары, таҥыллар муосталары, о.д.а. оҥорор былананаах.

Бастакы сакаас – Сунтаар парома балаҕан ыйыгар бүтүөхтээх.