Жатайга оҕо итии ууга буста, Дьокуускайга эр киһи суол саахалыгар эчэйдэ

Ааспыт сууккаҕа өрөспүүбүлүкэ үрдүнэн 6 буруйу оҥоруу түбэлтэтэ бэлиэтэннэ диэн СӨ Борокуратуурата иһитиннэрэр.

Дьокуускай куорат Лермонтов уулуссатыттан күүс өттүнэн төлөпүөнү былдьаабыттар,  «Totem» бэлисипиэти уорбуттар.

Эмиэ Дьокуускайга уонна Муома улууһугар түөкүннээһин туһунан үҥсүү киирбит, 760 тыһыынча солк. тахса харчы уоруллубут.

Өлүөхүмэ улууһугар итирик киһи массыына ыыта сылдьан иккистээн тутуллубут.

Жатай бөһүөлэгэр 2023 с.т. оҕо аһыыр иһитин ыраастыыр тэрилгэ баар ууну үрдүгэр куттан, итиигэ буһан балыыһаҕа киирдэ.

Суукка иһигэр киһи өлүүлээх суол быһылаана тахсыбыта бэлиэтэммэтэ. Дьокуускай куорат Бүлүүлүүр суолун 5 км итирик киһи «Тойота Виста» массыынанан айаннаан иһэн «КАвЗ» оптуобуһу кытары харсыста. Ол түмүгэр  оптуобуска олорсон испит 1964 с.т. эр киһи эт-хаан араас эчэйиитин ылан балыыһаҕа киирдэ.

Суукка иһигэр итирик туруктаах 5 суоппар массыына ыыта сылдьан тутулунна.