Жатайга рейдэ күүһүрдэ

Бу аҕыйах хонуктааҕыта социальнай ситимҥэ Жатайга бэйдиэ ыт оҕолоох дьахтарга саба түспүтүн туһунан сурах тарҕаммыта. Ол кэнниттэн тута аны Жатайга бэйдиэ ыттар киһини төгүрүйбүт видеолара тарҕаммыта. Инньэ гынан, СӨ Бэтэринээрийэҕэ департаменын иниспиэктэрдэрэ  Жатай бөһүөлэгэр тиийэн олохтоох дьаһалтаны кытта үлэлэстилэр.

Быһылаан тахсыбыт сиригэр баар видеокамераны көрдүлэр.  Оҕолоох дьахтарга саба түспүт ыт хаһаайынын көрдүүллэр. Бу хаһаайын административнай эппиэтинэскэ тардыллыаҕа.

Маны сэргэ, ити күн сарсыныгар иниспиэктэрдэр Строд уулуссатын 3, 3/1, 5, 5/1 №-дээх аадырыстарга сылдьан дьиэ кыылын иитии быраабылатын кумааҕыларын туттардылар. Аны мантан ыла хас бэнидиэнньик аайы СӨ Бэтэринээрийэҕэ департаменын иниспиэктэрдэрэ олохтоох  дьаһалтаны уонна полицияны кытта маннык рейдэлэри оҥорор буолуохтара.

Олунньу 6 күнүнээҕи түмүгүнэн, Жатай бөһүөлэгэр дьиэ кыылын иитиигэ быраабыланы кэһии иһин, ол эбэтэр хаһаайын ытын босхо ыыппытын иһин  биир боротокуол оҥоһулунна.