Жатайга «Точка будущего» үөрэҕирии комплексын тутуу саҕаланна

Жатайга Саха сиригэр бастакы «Точка будущего»  үөрэҕирии саҥа комплексын тутуу саҕаланна. Бу эбийиэк олоччу «Новый дом» чааһынай аһымал пуонда үбүнэн тутуллуоҕа. Өрөспүүбүлүкэ устуоруйатыгар чааһынай пуонда маннык улахан үөрэҕирии эбийиэгин аан бастаан үбүлээн туттарыаҕа.

— «Новый дом» пуонда көмөтүнэн  үөрэҕирии эбийиэгин тутууну саҕалаатыбыт. Бу комплекс Саха сирин усулуобуйатыгар сөп түбэһэр гына бырайыактанна. Мин бу пуонда төрүттээччитигэр Альберт Авдолянҥа уонна попечитэллэр  Сэбиэттэрин баһылыгар Сергей Чемезовка дириҥ махталбын биллэрэбин. Бу чааһынай биисинэс социальнай эппиэтинэһин үтүө холобура буоларан таһынан, кэлэр кэскилбитигэр кылаат, дойдубут сайдыытыгар анаммыт сөптөөх туттунуу буолар. Бу курдук эбийиэктэр тутуллалларын көрөн, дойдубут инники кэскилигэр эрэл бөҕөргүүр. Ханнык да уустук кэмнэргэ биһиги өрөспүүбүлүкэбит үөрэҕириигэ ураты болҕомтотун уурара, бу комплекс тутуллан үөрэҕирии сайдыытыгар саҥа үрдүк таһымы олохтуоҕа диэн эрэллээхпин, — диэн махтанан туран  Ил Дархан Айсен Николаев эттэ.

Саҥа комплекска үөрэх босхо ыытыллыаҕа. Үөрэх кыһатыгар оҕолор чинчийэр, айар, идэтийэр дьоҕурдарын сайыннарарга табыгастаах усулуобуйа олохтонуоҕа. Бастакы маннык хайысхалаах комплекс Иркутскайга тутуллубута, иккис Жатайга баар буолуоҕа.

— «Точка будущего» —  биисинэс социальнай эппиэтинэһи ылыныытын холобура буолуохтаах. Саха сирин кытта биһигини өр сыллаах бигэ сыһыан сибээстиир. Ол эрэн бу бырайыак чопчу кыраныыссата суох – ханнык баҕарар эрэгийиэн дьаһалтата бу үлэ суолтатын өйдөөтөҕүнэ кыттыһыан сөп. Онон, Иркутскай уобалас уонна Саха сирэ кэнниттэн маннык кииннэр атын эрэгийиэннэргэ эмиэ баар буолуохтара, — диэн эттэ Сергей Чемезов.

Саҥа дьиэҕэ аныгы үөрэх тэриллэрэ, миэбэл баар буолуоҕа, араас лабораториялар уонна успуорт инфраструктурата тэриллиэҕэ, ол иһигэр бассейннаах, спортивнай саалалаах спортивнай блок тутуллуоҕа. Жатайга тутуллар комплекска  200 миэстэлээх куорпус, 1-6 кылаастарга аналлаах, 7-11 кылаастарга аналаах куорпустар,  учууталларга анааллаах 50 кыбартыыралаах кампус тутуллуоҕа.