Жатайга үөрэх кластера туттулла турар

Ил Дархан Айсен Николаев нэдиэлэтээҕи  былаанын чэрчитинэн Жатай бөһүөлэгэр сылдьан,  «Точка будущего» үөрэх комплексын тутуу хаамыытын билистэ.

Миэстэтигэр ыытыллыбыт бэрэбиэркэ түмүгүнэн, тутуу былаан быһыытынан баран иһэрин, эбийиэк 2026 сыл балаҕан ыйыгар үлэҕэ киириэхтээҕин бэлиэтээтэ. Бүгүҥҥү күҥҥэ кластеры тутуу 70% бэлэм.

“Оҥоһуллуохтаах үлэ үгүс. Кэлэр сылга өрөспүүбүлүкэҕэ эрэ буолбакка, дойду таһымыгар үөрэхтээһин хааччыллыытын уонна хаачыстыбатын өттүнэн биир бастыҥ комплекс кэмигэр үлэҕэ киирэригэр бигэ эрэллээхпин. Тутуу судаарыстыба бүддьүөтүн үбүн туһаммакка, бырайыак бүтүннүү чааһынай үбүнэн олоххо киирэн эрэр.  Өрөспүүбүлүкэ тырааныспар инфраструктуратын уонна тиэхиньиичэскэй сибээс боппуруостарын быһаарыыга көмөнү оҥоруоҕа”, — диэн бэлиэтээтэ Айсен Николаев.

Учаастакка монолитнай үлэ толору түмүктэннэ, үс эбийиэккэ ититии ситимин үлэлэппиттэр. Эбийиэктэргэ инженернэй систиэмэлэри туруоруу болдьоҕун иннинэ саҕаланна. Бэдэрээтчит үлэни түргэтэтэр сыалтан үлэһиттэрин элбэтэн биэрэр соруктаах.

Кластер 2021 сыллаахха Ил Дархан Айсен Николаев уонна “Саҥа дьиэ («Новый дом»)” аһымал пуондатын төрүттээччи Альберт Авдолян илии баттаспыт сөбүлэҥнэринэн олоҕуран тутулла турар.

Үөрэх кластерын бырайыагар 200 миэстэлээх оҕо саада, сэттэ дьиэлээх үөрэх комплекса, ол иһигэр 360 миэстэлээх алын сүһүөх оскуола (1-6 кылаастар), 480 миэстэлээх орто оскуола (7-11 кылаастар), бассейн, спортивнай уонна гимнастика саалалара, оҕо иитэр ыаллар олорор дьиэлэрэ, учууталларга анаан икки мэндиэмэннээх олорор икки дьиэ.

Комплекс оҕо чинчийэр уонна айар кыаҕын олоххо киллэрэргэ бары усулуобуйаны тэрийиэҕэ. «Саҥа дьиэ (“Новый дом”) аһымал пуондата «Точка будущего» үөрэх комплексын биисинэс социальнай эппиэтинэһин холобурун быһыытынан бастакынан Иркутскай куоракка туппута.