Сүүнэ ыт оҕолоох ийэҕэ саба түһэ сатаабыт

Бүгүн, олунньу 2 күнүгэр, Жатай бөһүөлэгэр кыра оҕолоох ийэҕэ ыт саба түһэн, иэдээн тахса сыста.

Ийэ оҕотун кытта Севернай уулусса 23-с нүөмэрдээх дьиэ утары  турар оҕо былаһааккатыгар салгын сии сырыттаҕына, эмискэ улахан баҕайы ыт саба түспүт. Олус куттаммыт ийэҕэ ааһан иһэр киһи көмөлөспүт.
Бу туһунан эдэр ийэ Вероника «КП-Якутия» саайтка маннык кэпсээбит:
— Бүгүн, олунньу 2 күнүгэр, икки саастаах кырачаан оҕобун кытта салгын сии сырыттахпына, Севернай уулусса 23-с №-дээх дьиэтин утары оҕо былаһааккатыгар салгын сиэн баран, дьиэбит диэки хааман истэхпитинэ, олус улахан ыт саба түстэ. Мин  170  см үрдүктээхпин, ол эрээри бу ыт икки атаҕар турдаҕына, миигиннээҕэр үрдүк. Кутталбыттан оҕобун көтөҕөн ылбытым. Ыт буоллаҕына, оҕобор түһэ сатыыр, ыстааныттан сыыһа-халты хабыалыыр, ырдьыгыныыр. Биһиги дьолбутугар, ааһан иһэр эдэр киһи өрүһүйдэ. Дьиэбитигэр диэри атааран биэрдэ. Мин куттаммытым билигин да ааһа илик.  Уһуйааммытыгар сатыы барабыт-кэлэбит. Кимиэхэ өссө үҥсэбит, тугу гынабыт!!!

Жатай бөһүөлэгин олохтоохторо бэйдиэ сылдьар ыттар элбэхтэрин, үөрүнэн сылдьан дьону куттуулларын туһунан куруук үҥсэллэр, айдаараллар эбит. Ол эрээри олохтоох дьаһалта улахан хамсааһыны оҥорбот. Тоҕо диэтэххэ, ыттары сокуон көмүскүүр. Оттон ыты тутар приюттары тутуохтарын олохтоох дьаһалтаҕа үбүлээһин суох. Бэлиэтээн суруйдахха, бэйдиэ сылдьар ыт кыһалҕата төгүрүк сыл устата барар. Мантан саас ыттар эмиэ үөрдүһүөхтэрэ. Ыты тутар сулууспа сайаапканан үлэлиир, ол эрээри бэйдиэ сылдьар ыт ахсаана аччаабат.