«Жемчужина творчества» куонкуруска Үөдэйтэн Анастасия Сысолятина Гран-при хаһаайынынан буолла

Атырдьах ыйын 5 күнүгэр Дьокуускай куорат  SMART-бибилэтиэкэтигэр доруобуйаларынан хааччахтаах айар талааннаах дьоҥҥо өрөспүүбүлүкэтээҕи «Жемчужина творчества» куонкурус буолан ааста. 

Куонкурус үгэс быһыытынан сыл аайы ыытыллар. Тэрээһиҥҥэ араас улуустартан 20 кыттааччы бэйэтэ айбыт хоһоонун дьүүллүүр сүбэ иннигэр таһаарда.

Бу да сырыыга Нам улууһун  айар куттаах дьоно ситиһии көтөллөннүлэр. Ол курдук, Үөдэйтэн Анастасия Сысолятина Гран-при хаһаайынынан ааттанан, ноутбугунан наҕараадаланна, Бөтүҥтэн Александра Соловьева «Самый радужный стих» анал ааты ылары ситиһэн, мультиварканы бэлэх тутта, Арбыҥтан Христина Софронова туоһу суругунан бэлиэтэннэ диэн, Нам улууһун дьаһалтатын пресс-сулууспата иһитиннэрэр.

«Айар куттаах дьоммутун үрдүк ситиһиилэринэн эҕэрдэлиибит, өссө да  элбэх үтүө үлэ күөдьүйэн таҕыстын диэн алгыыбыт», — диэн Нам улууһун салалтата этэр.