Женни Стрюкова: «Суруналыыс идэтэ – араас идэлээх, майгылаах дьону кытта алтыһыннарар»

Бүгүн Саха төрүт бэчээтин күнүнэн айар үлэлэригэр ураты ситиһиилээх суруналыыстарга Бырабыыталыстыба дьиэтин Өрөспүүбүлүкэ саалатыгар судаарыстыбаннай наҕараадалары туттардылар.

Биһиги биир идэлээхпит, «Саха сирэ» хаһыат кэрэспэдьиэнэ Женни Стрюкова өр сыллаах үтүө суобастаах, айымньылаах үлэтин иһин СӨ Баһылыгын Грамотатынан наҕараадаланна. Женни Стрюкованы хаһыат ааҕааччылара тыа хаһаайыстыбатын бэлиитикэтин ырытыыларынан, тыа сирин, бултааһын-балыктааһын туһунан суруйууларынан билэр. Кини өр сыллаах үлэтин, ситиһиитин туһунан бу курдук санаатын үллэһиннэ:

— Мин бэчээт эйгэтигэр үлэлээбитим 28 сыл буолла. «Саха сирэ» хаһыакка олох-дьаһах, тыа хаһаайыстыбатын уо.д.а. тиэмэлэри сырдатабын. Суруналыыс үлэтэ олус эппиэтинэстээх дии саныыбын. Түргэн-тарҕан, чуолкай, ырытар кыахтаах буолууну, толкуйу эрэйэр. Суруналыыс идэтэ – араас идэлээх, майгылаах дьону кытта алтыһыннарар. Киһи биир сиргэ турбакка олоҕу кытта тэҥҥэ сайдарыгар көмөлөһөр. Өрөспүүлүкэбит Ил Дархана Саха төрүт бэчээтин күнүн олохтообута олус үчүгэй. Өйөбүллэрин иһин үлэлиир кэлэктииппэр махтанабын уонна идэлээх бырааһынньыкпытынан ис сүрэхпиттэн биир идэлээхтэрбин эҕэрдэлиибин!