Зондировщик-сөмөлүөттэринэн 23 улууска ардах түһэрэ күүһүрдүлүннэ

Саха сиригэр зондировщик-сөмөлүөттэр 31 оруобочай сырыыны оҥордулар, олор истэригэр 23 улуус хабылынна.

Бу улуустарга үлэ түмүгүнэн ардах түһэрэ күүһүрдүллүбүтэ бэлиэтэннэ. Бу туһунан брифиҥҥэ СӨ Нэһилиэнньэ олоҕун-дьаһаҕын, куттал суох буолуутун хааччыйыыга миниистирин бастакы солбуйааччы Айаал Вензель иһитиннэрдэ.

«Бүгүн сарсыарда 11:00 чааска  Өлүөхүмэ оройуонугар ойуур баһаарын умуруорууга Як-40 сөмөлүөт көтөрө былааннанар. Ону тэҥэ 11:00 чааска Ан- 26 «Атмосфера» Амма, Уус Майа, Чурапчы, Мэҥэ Хаҥалас, ону тэҥэ Таатта улуустарынан соҕуруу өттүгэр көтөрө былааннанар»,-диэн Айаал Вензель иһитиннэрдэ. Кини лаборатория-сөмөлүөттэр баһаартан сэрэхтээх буолууга уонна баһаартан куттал суох буолуутун намтатар сыалтан искусственнай ардаҕы ыҥырыыга туһаналларын санатта. Ону таһынан Айаал Вензель ЫБММ авиацията 38 сөмөлүөтү көтүппүтүн,  315 туонна уу ыстарбытын туһунан иһитиннэрдэ.

От ыйын 3 күнүнэээҕи сарсыардааҥы туругунан Саха сиригэр 108 ойуур баһаара турбута биллэр. «Ураты хонтуруолга 12 нэһилиэнньэлээх пууннартан  15 км чугас 11 ойуур баһаара турбута ылыллыбыта. Мантан билиҥҥитэ 3 баһаар бохсулунна», – диэн Айаал Вензель бэлиэтээтэ. Саха сиригэр 5 ойуур баһаарын умуруорууга  4 улуустарынан уопсайа 61 киһи туһааннаах сулууспалартан кыттар. Маны таһынан атын сулууспалар бэлэм олороллор.  Сиһилии манна аах.