«Звезднай» кыбаарталга тутуу тэтимнээхтик барар

Дьокуускайга федеральнай    инфраструктура кирэдьиитин  туһанан, киин куорат соҕуруу өттө сайдар.

Ол курдук, Дьокуускайга саҥа «Звезднай» түөлбэҕэ бастакы таас дьиэлэр үлэҕэ киирдилэр. Онно хаарбах дьиэҕэ олорбут дьон уонна тулаайах оҕолор көстүлэр. Ил Дархан Айсен Николаев ыам ыйын 27 күнүгэр саҥа микрооройуоҥҥа тутуу хаамыытын бэрэбиэркэлээтэ.

—  «Звезднай» микрооройуону тутуу инвестиционнай бырайыага 2021 сыллаахха саҕаламмыта.  «Звезднай» — киин куорат сайдыытын биир сүрүн хайысхата. Тутуу манна кэлимник ыытыллыаҕа. Ол курдук, манна 1980 миэстэлээх икки оскуола, 690 миэстэлээх икки оҕо саада, симиэнэҕэ 600 киһи сылдьар поликлиника, сабыылаах каток, супермаркет арааһа баар буолуоҕа», — диэн бэлиэтээтэ Ил Дархан.

Бүгүҥҥү күҥҥэ 32 олорор дьиэни тулаайах оҕолорго анаатылар.  469 олорор дьиэни хаарбах туруктаах дьиэттэн көһөр дьоҥҥо биэрдилэр. Сорох дьон куораттан ыраах сылдьар буолан, күлүүстэрин ыла иликтэр. атыттар докумуоннарын толоро сылдьаллар», — диэн быһаарда өрөспүүбүлүкэтээҕи ипотечнай ааҕыныстыба генеральнай дириэктэрэ Владимир Трегубов.

«Звезднай» кыбаарталы көрөн-истэн баран, Ил Дархан Айсен Николаев ылыммыт тэтими ыһыктыбакка,   бэдэрээччиттэр тустаах болдьохторугар тутууну түмүктүүллэригэр эрэнэрин биллэрдэ.