«Звезднай» түөлбэҕэ оскуола, уһуйаан, поликлиника, каток тутуллуохтара

«Звезднай» түөлбэҕэ оскуола, уһуйаан, поликлиника, каток тутуллуохтара

19.12.2022, 12:49
Бөлөххө киир:

Ил Дархан Айсен Николаев Ил Түмэҥҥэ туһаайбыт бэһис Анал этиитигэр куораттар сайдыыларын туһунан боппуруоһу таарыйда.

Ол курдук, Дьокуускай куорат, Нерюнгри уонна Алдан оройуоннарын социальнай-экэнэмиичэскэй сайдыыларын туһунан ыйаахтар тахсыбыттара. Ыйаахтар сүрүн сыаллара – өрөспүүбүлүкэ бөдөҥ куораттарын уонна бырамыысыланнай кииннэрин сайыннарыы буолар. Бу куораттарга өрөспүүбүлүкэ нэһилиэнньэтин аҥаарыттан элбэх — 545 тыһыынчаттан тахса киһи олорор.

Ол чэрчитинэн, былааҥҥа хоту дойдуга киһи олороругар табыгастаах куорат эйгэтин тэрийии, инфраструктура хаачыстыбатын үрдэтии, хаарбах дьиэлэртэн көһөрүү, олорор кыбаарталлары гаастааһын, дьон сылдьар, сынньанар уопсастыбаннай сирдэрин тупсарыы, о.д.а. баар.

Нерюнгригэ, Алдаҥҥа, Мииринэйгэ бырамыысыланнаһы уонна сервиснэй экэниэмикэни салгыы сайыннарыыга болҕомто ууруллар.

— Киин куоракка креативнай салааларга оҥорон таһаарыы саҥа көрүҥнэрэ тэриллиэхтэрэ. Дьокуускай «IT-столица» аатын ылан, манна сыыппара индустриятын инфраструктурата сайдыахтаах. Илиҥҥи экэнэмиичэскэй пуорумҥа Дьокуускай, Нерюнгри, Мииринэй куораттар маастар-былааннара сүрэхтэммитэ, оттон Алдан маастар-былаана оҥоһуллубута. Уһук Илин куораттарын бырайыактарыгар 100 миллиард солкуобай ыытыллыаҕа диэн бэрэсидьиэн Владимир Путин ахсынньы 15 күнүгэр этэн турар. Бу эппит куораттарым ол үбүлээһиҥҥэ кыттыахтара, — диэн этэн туран, Айсен Николаев олохтоох салайыныы уорганнарыгар федеральнай үбүлээһиҥҥэ хапсар туһуттан, сири-уоту былааннааһын, туһаныы, тутуу докумуоннарын ирдэбилгэ эппиэттэһэр курдук оҥорторорго сүбэлээтэ.

Чугастааҕы сылларга улахан куораттарга туох уларыйыылар буолуохтарай?

Дьокуускай соҕуруу өттүгэр инфраструктураны сайыннарыы үлэтэ салҕаныаҕа. “Звездный” түөлбэҕэ быйыл аан бастаан 26 тыһыынча кв.м. иэннээх олорор дьиэ үлэҕэ киириэҕэ. Онтон кэлэр сылга 600 киһини көрөр кыахтаах поликлиника, 315 миэстэлээх оҕо саада, 990 миэстэлээх оскуола уонна спортивнай саалалаах, сабыылаах каток тутуллуохтара.

2023 сылга 5 саҥа оскуола тутуллан киириэҕэ. Кадеттар саҥа оскуолаҕа үөрэнэр кыахтаныахтара. Бу патриотическай иитиигэ биир дьоһун хардыы буолар. “ДСК” түөлбэҕэ иккис улахан оскуоланы тутуу саҕаланыаҕа. Сэргэлээх шоссетыгар 34 №-дээх интэринээт-оскуола эргэ дьиэтин оннугар Адаптивнай комплекс тутуллуоҕа. Бу 200 миэстэлээх уһуйааннаах, 350 миэстэлээх интэринээттээх, 550 миэстэлээх оскуола буолар. Доруобуйаларыгар хааччахтаах оҕолорго үчүгэй усулуобуйалаах үөрэх кыһата буолуоҕа, — диэн Ил Дархан бэлиэтээтэ.

Айсен Сергеевич Дьокуускайга олбоурдары, олорор сирдэри тупсарыыга 450 мөлүйүөн солкуобай көрүллүөхтээҕин туһунан эттэ. Бу урут өссө тыырылла илик үбү-харчыны толору туһанан, үлэни-хамнаһы тэтимирдэргэ, далааһынын кэҥэтэргэ ыҥырда. Ахсыс «Азия оҕолоро» оонньуулары киин куорат тупсан-киэркэйэн көрсүөхтээҕин тоһоҕолоон бэлиэтээтэ.

«Газпром – оҕолорго» бырагырааманан Мархаҕа катоктаах уонна бассейннаах саҥа физкультурнай-чэбдигирдэр комплекс тутуллуоҕа. Бу бырагырааманан Чульмаҥҥа уонна Алдаҥҥа физкультурнай-чэбдигирдэр комплекстар тутуллубуттара.

Нерюнгригэ оройуоннааҕы киин балыыһа үс сүрүн куорпуһун – дьахтар консультациятын, балыыһа “Б” блогун, тирии-венерологическай диспансер дьиэлэрин тутуу саҕаланыаҕа. Чульмаҥҥа 9 №-дээх оскуола тутуллуоҕа. Иенграҕа уонна Чульмаҥҥа “Газпром” бырайыагынан, нэһилиэнньэлээх пууннары гаастааһын бырагыраамата саҕаланар.

Алдаҥҥа  «Металлург» стадиону уонна хайыһар-биатлон трассатын өрөмүөннээһин былааннанар.

2023 сылга диэри 7 үөрэх тэрилтэтэ, Аллараа Кураанахтааҕы оҕо ускуустубатын оскуолата, Саха сирин судаарыстыбаннай оркестрын дьиэтэ тутуллуохтара. Ону тэҥэ, уулуссалар, болуоссаттар, сквердэр ирдэбилгэ, нуормаҕа эппиэттиир курдук оҥоһуллуохтара.

Дьокуускай уонна Алдан “Үлэ Албан аатын куората” үрдүк ааты ылбыт куораттар буолаллар. Онон бу икки куоракка “Үлэ Албан ааттаах куораттар” стелалар оҥоһуллуохтаахтар.

Лента
Салгыы
5 февраля
  • -39°C
  • Ощущается: -39°Влажность: 67% Скорость ветра: 1 м/с

Сообщить об опечатке

Текст, который будет отправлен нашим редакторам: