Зырянкаҕа икки элбэх кыбартыыралаах дьиэ үлэҕэ киириэҕэ

Сотору кэминэн Үөһээ Халыма оройуонун Зырянка сэлиэнньэтигэр хаарбах дьиэттэн көһөрүү бырагырааматынан икки элбэх кыбартыыралаах дьиэ үлэҕэ киириэҕэ. Бу туһунан Ил Дархан Айсен Николаев «Прямой разговор» биэрии кэмигэр иһитиннэрдэ. Дьиэлэр 45-тии кыбартыыралаах буолуохтара. 

«Бүгүн Зырянкаҕа икки дьиэ тутулла тутар. Бастакы дьиэ бу сыл бүтүөҕэр диэри үлэҕэ киириэҕэ, олохтоох дьон күлүүстэрин тутуохтара. Онтон иккис дьиэ билигин 80-90% бэлэм. Үлэ көхтөөхтүк ыытыллар, тутуу матырыйаала тиийэр. Быйыл саас суол-иис суох буолан, тутааччылар сайын биирдэ тиийбиттэрэ. Онон кыра хойутааһын баар. Ол да буоллар, этиллибит болдьоҕор эбийиэги туттарыахтара диэн эрэнэбит. Ахсынньыга табыллыбатаҕына, тохсунньуга үлэҕэ киириэҕэ», — диэтэ Айсен Николаев. 

Тутуу министиэристибэтэ иһитиннэрбитинэн, 2020-2025 сылларга Арктическай оройуоннарга 496 хаарбах дьиэттэн 8250 киһини саҥа дьиэлэргэ көһөрүөхтэрэ. Билигин номнуо 1917 киһи саҥа дьиэлэннэ.