1 Маайдааҕы «тиллибит» аккырыыккалар

Сааскылыы чаҕылхай күннээх, күөх да күөх халлааннаах күҥҥэ 1 Маай бырааһынньыгын бэлиэтиибит. Төһө да өрөгөйдөөх, маассабай параат буолбатаҕын иһин, Саас, Үлэ бырааһынньыга хас биирдии киһини үөрдэр, санаатын кынаттыыр.

Сунтаар улууһун Арыылаах орто оскуолатын учууталлара уонна үөрэнээччилэрэ хамсык кэмигэр  1 Маайынан сэбиэскэй кэмнээҕи аккырыыккалары «тилиннэрэн», видео оҥорон ыыппыттара, социальнай ситиминэн  тарҕаммыта, дьон биһирэбилин ылбыта.

Маннык аахсыйаларга оҕолор урукку кэм сыаннастарыгар үөрэнэллэр, кыттыһаллар, төрөппүттэрин, эбэлэрин-эһэлэрин олохторун, оҕо саастарын  туһунан элбэҕи билэллэр. Онон маннык аахсыйа эмиэ патриоттуу иитии биир көрүҥэ буолар.

Бу курдук өрүү көхтөөх, түмсүүлээх буолуоҕуҥ, сааскы күн дууһаҕа чаҕылыйа тыктын! Пиэрибэй Маай өрө көтөҕүллүүллээх аккырыыккалара санааҕытын көтөхтүн!