Тыһыынчаттан тахса киһи субуотунньуктаата

Муус устар 26 күнүттэн саҕалаан, Саха сиригэр субуотунньуктар буола тураллар. Бу аахсыйа Бүтүн Арассыыйатааҕы субуотунньук чэрчитинэн бары улуустарга, куораттарга ыытыллар. Дьокуускайга VIII «Азия оҕолоро» норуоттар икки ардыларынааҕы спортивнай оонньуулары көрсө ырааһырдыы быһыытынан ыытыллар. 

Ил Дархан, бырабыыталыстыба дьаһалтатын пресс-сулууспата.

Субуотунньуктарга номнуо тыһыынчаттан тахса киһи кытынна. Үлэни тэрилтэлэринэн, уокуруктарынан тэрийэллэр. Муус устар 30 күнүгэр куорат дьаһалтатын, муниципальнай тэриллииллэр, министиэристибэлэр, биэдэмистибэлэр үлэлиир кэлэктииптэрэ, үөрэх кыһаларын устудьуоннара тахсан, уопсастыбаннай сирдэри ыраастаатылар, бөхтөн хомуйдулар.

Чахчы, куораппыт ырааһырбыт көрүҥнэнэ түстэ. Быйыл хаар эрдэ ууллан уонна куорат дьаһалтата эрдэттэн таһан, уулуссаларга, болуоссаттарга хаар букатын суох.

Ол түмүгүнэн, барыта 2000-тан тахса куул бөҕү хомуйан, тиэйдилэр.

Аахсыйаҕа салгыы муниципальнай тэриллиилэр кыттыһыахтара. 2025 сылга Бүтүн Арассыыйатааҕы  Тупсаран оҥоруу эбийиэктэрин таларга онлайн-куоластааһын буолуоҕа. Маны тэҥэ, бэрэсидьиэн көҕүлээбит «Формирование комфортной городской среды» федеральнай бырайыагын  «Жилье и городская среда» национальнай бырайыакка кыттыбыт улуустар, куораттар субуотунньукка көхтөөхтөр.

Санатар буоллахха, Ил Дархан Айсен Николаев бу күннэргэ субуотунньуктарга кыттарга, көхтөөх буоларга ыҥырбыта. Ыам ыйа — ыраастаныы, кыһыҥҥы бөхтөн, киртэн босхолонуу кэмэ. Онон хас биирдии киһи олорор сиригэр, тулалыыр эйгэтигэр бэрээдэги олохтуурга кылаатын киллэрэр.

Ил Дархан, бырабыыталыстыба дьаһалтатын пресс-сулууспата.