101 саастаах сэрии бэтэрээнэ Наум Слепцову Мархаҕа «Тиэргэнинэн ыллыыбыт» аахсыйаҕа эҕэрдэлээтилэр

Бүгүн Марха бөһүөлэгэр 101 саастаах Аҕа дойду Улуу сэриитин кыттыылааҕын Наум  Слепцову бэйэтин дьиэтин олбуоругар  «Тиэргэнинэн ыллыыбыт» диэн Улуу Кыайыы 80 сылыгар анаммыт  аахсыйа-кэнсиэр буолла.

Ытык кырдьаҕас ис-иһиттэн бэркэ үөрэн-көтөн бу тэрээһиҥҥэ кыттыыны ылла. Аҕа дойду Улуу сэриитин кыттыылааҕа Наум Слепцову СӨ Бырабыыталыстыбатын Бэрэссэдээтэлин Бастакы солбуйааччы Дмитрий Садовников Улуу Кыайыы 80 сылынан эҕэрдэлээтэ. Дмитрий Дмитриевич ытык кырдьаҕаска, Улуу Кыайыыны уһансыбыт киһиэхэ, барҕа махталын тиэрдэн туран, «эн олоҕуҥ үүнэр көлүөнэҕэ холобур буолар» диэн бэлиэтээтэ.

Байыаннай дьайыы кыттыылааҕа, РФ Дьоруойа, «Патриот» Ыччат киинин дириэктэрин солбуйааччы Николай Евдокимов ис-иһиттэн долгуйан сэрии бэтэрээнин эҕэрдэлээтэ уонна «биһиги инники кирбиитэ сылдьар байыастарбыт эн курдук ытык киһиэхэ тэҥнэһэллэр» диэн эттэ.

Аҕа дойду Улуу сэриитин кыттыылааҕа Наум Трифонович Слепцов «Тиэргэнинэн ыллыыбыт» тэрээһинтэн олус астыммытын биллэрдэ. Кини сарсырда 7 чааска туран күнэ сэрээккэттэн саҕаанарын кэпсээтэ. Саха араадьыйатын “олоҕум аргыһа” диэн бэлиэтиир. «Саха сирэ» хаһыат сонуннарын араадьыйаттан истэн билэр эбит. Ытык киһибитигэр кытаанах доруобуйаны, ыраас халлааннаах эйэлээх олоҕу баҕарабыт!