112,30 киилэлээх тыкваны ханна үүннэрбиттэрий?

Хатас нэһилиэгин олохтооҕо Наталия Нохсорова сайын аайы тэлгэһэтигэр араас дьэрэкээн сибэкки уонна оҕуруот аһын дэлэйдик үүннэрэр. 

Бу туһунан «Саха» НКИХ иһитиннэрэр. Наталия сыл ахсын туох эмэ саҥа көрүҥү үүннэрэр эбит. Ол курдук, быйыл «Гигантский Атлант»  диэн тыква суордун  аан бастакытын олордубут. Тыква 112,30 киилэҕэ дылы улааппыт, төрдүө буолан нэһиилэ көтөҕөн киллэрбиттэр. Били, «Золушка» остуоруйаҕа дылы карета эрэ буолара хаалбыт.

«Тыква төһө да улааттар хаҕа олус чараас, кэбирэх, киһи тыҥыраҕынан да хаҕылаан  ылыан сөп курдук. Аны аһа ханнык да суортааҕар минньигэс,  дыня курдук сымнаҕас», — диэн сатабыллаах Далбар хотун Наталия Устиновна үөрүүтүн үллэстэр.