14 киһиэхэ искэн ыарыыларын буллулар

«Онкодесант» бырайыак чэрчитинэн, 2025 сылга өрөспүүбүлүкэҕэ 1500 киһи доруобуйатын туругун бэрэбиэркэлэммитин туһунан доруобуйа харыстабылын министиэристибэтэ иһитиннэрэр.

«Былырыын «Онкодесант» бырайыак чэрчитинэн, Орто Халыма, Томпо, Ньурба, Бүлүү, Анаабыр, Мииринэй, Нам улуустарыгар сэттэ айан тэриллибитэ. Онкологтар 1500-тэн тахса киһини бэрэбиэркэлээтилэр, 80 киһини Дьокуускайга эбии бэрэбиэркэҕэ ыыппыттара, онтон 14 ыарыһахха искэн ыарыыта үөскээбитэ быһаарылынна. Сүрүнэ, бу дьон бары ыарыы бастакы түһүмэҕэр сылдьаллара. Онон үтүөрэллэригэр эрэл баар. Быйыл Алдан, Амма, Үөһээ Бүлүү, Бүлүү,  Ленскэй, Өлүөхүмэ, Нам, Нерюнгри, Ньурба, Томпо, Чурапчы, Уус Маайа улуустарыгар сырыылар былааннаммыттар», — диэн өрөспүүбүлүкэ доруобуйа харыстабылын министиэристибэтэ бэлиэтээтэ.

Өрөспүүбүлүкэтээҕи онкологическай диспансер иилээн-саҕалаан ыытар «Онкодесант» бырайыагын сүрүн сыалынан нэһилиэнньэни үрдүк хаачыстыбалаах диагностиканан уонна онкология исписэлиистэриттэн консультацияларынан хааччыйыы буолар.

Хас биирдии сырыы – ыарыһаҕы көрүү эрэ буолбакка, оройуоннааҕы кииннэммит балыыһалар  үлэһиттэрин бэлэмнээһини киллэрэн туран, болҕомтолоохтук былааннаммыт тэрээһин. Мобильнай биригээдэҕэ араас хайысхалаах сүрүн исписэлиистэр киирэллэр: гинеколог-онколог, хирург-онколог, маммолог, УЗИ исписэлииһэ, эндоскопист. Быраастар бэлиэтииллэринэн, бу холбоһуктаах ньыма кутталлаах ыарыылары бастакы түһүмэххэ, эмтээһин саамай көдьүүстээх кэмигэр, быһаарарга көмөлөһөр.

Санатан эттэххэ, «Онкодесант» бырайыак Арассыыйа бэрэсидьиэнэ Владимир Путин сорудаҕынан олоххо киирэр «Уһун уонна көхтөөх олох» национальнай бырайыак чэрчитинэн барар, Саха сирин олохтоохторугар мэдиссиинэ көмөтүн ылар кыаҕы үрдэтиигэ туһуланар.

«Онкодесант» бырайыак көмөтүнэн искэн ыарыытын бастакы түһүмэҕэр булан, ситиһиилээхтик эмтэнии кыаҕын биллэ улаатыннарар уонна олохтоохторбут доруобуйаларын харыстыыр ​​кыахтаахпыт», — диэн доруобуйа харыстабылын миниистирэ Лена Афанасьева бэлиэтиир.

Сиһилии: https://www.sakha.gov.ru/news/18773