16 сыллааҕыта төрөөбүт кырачааны чахчы уларыппыттар дуо?

Дарья Лузина морг докумуоннарын билсэн баран, 16 сыллааҕыта Оҕо төрөтөр дьиэҕэ кини оҕотун уларыппыттарын туһунан уорбалыыр санааҕа кэлбит.

Оҕо өлбүтүн туһунан докумуоҥҥа көстөрүнэн, саҥа төрөөбүт кырачаан уол оҕо эбит. Онтон 2008 сыллаахха ЗАГС салайааччыта биэрбит төрөөһүн туһунан сибидиэтэлэстибэтигэр Дарья Лузина кыыс оҕону төрөппүтүн уонна оҕо өлбүтүн туһунан ыйыллыбыт.
Бу дьыаланан РЕН ТВ суруналыыстара  Хаандыгаҕа  бэйэлэрэ силиэстийэ ыыппыттарын кэнниттэн силиэдэбэтэллэр моргтан докумуоннары бэрэбиэркэҕэ ыларга эрэннэрбиттэр.

«Мин гинеколог Е-ны холуобунай эппиэтинэскэ тардалларыгар сайабылыанньа суруйбутум. Силиэдэбэтэлгэ бэйэм уорбалааһыммын тириэрдибитим», – диэбит Дарья Лузина.
Кини уорбалыы саныырынан,  гинеколог  Е. кини уолун уларыппыт – Дарья гинеколог социальнай ситимнэрин үөрэтэ сылдьан, бэйэтигэр майгынныыр уол оҕо хаартыскатын бэлиэтии көрбүт.
Бу устуоруйа туһунан кулун тутар 16 күнүгэр, баскыһыанньаҕа 23.00 чааска РЕН ТВ ханаалага «Итоговая программа с Петром Марченко» биэриигэ кэпсиэхтэрэ.