Саха сиригэр 500-тэн тахса АДПИ туруордулар

Бу сыл олунньу 5 күнүттэн ахсынньы 31 күнүгэр диэри Саха сиригэр «Предупреди пожар – установи АДПИ» социальнай аахсыйа ыытыллар.

Манна баһаартан сэрэхтээх буолуу судаарыстыбаннай сулууспатын 102 үлэһитэ кытынна, кинилэр 234 дьиэ кэргэҥҥэ 248 АДПИ туруордулар. Ону тэҥэ аахсыйаҕа 24 атын тэрилтэ бэрэстэбиитэлэ кытынна, кинилэр 253 ыал дьиэтигэр 260 АДПИ туруордулар. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Баһаартан сэрэтэр аныгы тэрили туруортарарга уустук балаһыанньалаах эбэтэр кыаммат элбэх оҕолоох дьиэ кэргэттэр куорат таһынааҕы уокуруктарынан уонна куорат дьаһалталарыгар сайабылыанньа суруйуохтаахтар. АДПИ-ны истиэнэҕэ уонна дьиэ үрдүгэр туруорарга эбии баһаарынай ситим тардыллара уонна тэрил ылыллара ирдэммэт. Ол оннугар сыл устата биирдэ батареятын уларытар уонна пылесоһунан электроннай датчик камератын үрдэрэр наада.

АДПИ – автономнай баһаары сэрэтэр тэрил кыра да буруо сытыгар улахан тыас таһааран дьону сэрэтэр. Оннооҕор түүн ортото тыаһаан дьону уһугуннаран иэдээн тахсарыттан сэрэтэр аналлаах. Хас биирдии ыал дьиэтигэр маннык тэрил баар буолуохтаах.