2025 сыл сүрүн ситиһиилэрэ: Плазмосорбция сэдэх процедурата аан бастаан оҥоһулунна

Ааспыт сыл сэтинньитигэр онкология өрөспүүбүлүкэтээҕи диспансерын устуоруйатыгар киирэр түгэн — плазмосорбция процедурата оҥоһулунна.

Анестезиология, реанимация уонна интенсивнэй терапия отделениетын сэбиэдиссэйэ Николай Ефимов салалтатынан оҥоһуллубут процедура эрэгийиэҥҥэ мэдиссиинэ үрдүк технологиялаах көмөтүн сайыннарыыга дьоһун суолталаах хардыынан буолла. Кини этэринэн, хаан ыраастаммыт плазмата эмтэнээччигэ төттөрү киллэриллэн, уопсай туруктара биллэрдик тупсар.

Плазмосорбция — хааны ыраастааһын аныгы ньымата. Бу ньыма плазматтан токсическай бэссэстибэлэри, ыарыһах ыарахан туругар организмҥа мунньуллубут атын буортулаах компоненнары таһаарарга көмөлөһөр. Тоһоҕолоон эттэххэ, маннык ньыманы Арассыыйа уонна аан дойду сүрүн килииникэлэригэр киэҥник туһаналлар.