25 киилэ ынах этин уоран тутулунна

Бу кыһын биир улууска уопсайа 700 тыһыынча солкуобайдаах  убаһа этин уораннар, улахан араллаан тахса сылдьыбыта. Оттон бу күннэргэ Ньурба улууһугар 25 киилэ эти уордулар. 

Ис дьыала министиэристибэтин отделын Ньурбатааҕы дьуһуурунай чааһыгар   85 саастаах ытык кырдьаҕастан 20 тыһ. солк. суумалаах 25 киилэ ынах этин уорбуттарын туһунан сайабылыанньа киирбит. Суһал ирдиир үлэ түмүгэр, холуобунай ирдэбил үлэһиттэрэ уорбаланааччыны,  эмсэҕэлээччи аймаҕын, хас да сууттана сылдьыбыт 42 саастаах эр киһини туппуттар.

Ол курдук, эмсэҕэлээччи аймаҕыгар олоро сылдьан,  этин кини дьиэтигэр уурбут. Кырдьаҕас ыалдьан балыыһаҕа киирбитин кэннэ,  уорбаланааччы хас да күн арыгылаабыт. Харчыта бүппүтүгэр  аймаҕа уура сыппыт  этин уоран атыылаабыт.  Атыылаабыт харчытынан ас уонна арыгы атыыласпыт.

Билигин эр киһиэхэ РФ Холуобунай кодексын  158 ыст. 2 чааһынан холуобунай дьыала тэрилиннэ.