40 тыһ.солкуобайын уордарбыт…

Бу күннэргэ Ис дьыала министиэристибэтин Мииринэй оройуонунааҕы отделыгар биир эр киһиттэн харчытын уордарбытын туһунан сайабылыанньа киирбит. Бу туһунан ИДьМ пресс-сулууспата иһитиннэрдэ.

Ис дьыала уорганнарын үлэһиттэрэ суһал-ирдиир үлэлэрин түмүгэр, уорбаланааччыны булбуттар. Ол курдук эмсэҕэлээччи билэр киһитэ,  43 саастаах урут сууттана сылдьыбыт киһи эбит.

Эр дьон бииргэ арыгылаабыттар, эмсэҕэлээччи утуйбутун кэннэ,  бүрүүкэтин хармааныттан 40 тыһ. солк. уоран ылбыт. Эр киһи уорбут харчытын бэйэтин наадатыгар туттубут.

Уоруйахха РФ Холуобунай кодексын 158 ыст. 2 чааһынан холуобунай дьыала тэриллибит.