Аармыйаҕа ыҥырыллыы сааһа уларыйыаҕа

Аармыйаҕа билигин уолаттар 18 саастарыгар ыҥырыллар буоллахтарына, саҥа сокуон таҕыстаҕына 21 саастарыгар биирдэ бэбиэскэ тутар кыахтаныахтара. Бу туһунан сокуон барылын бэҕэһээ Судаарыстыбаннай Дуумаҕа Оборуона кэмитиэтин бэрэссэдээтэлэ Андрей Картаполов салайааччылаах дьокутааттар бөлөхтөрө киллэрдэ.

Сокуон барылыгар сурулларынан, аармыйаҕа ыҥырыллыы сааһа 21-тэн 30 сааска диэри буолуоҕа. Билигин аармыйаҕа уолаттары 18 саастарыттан 27-гэр диэри ыҥыраллар. Сокуон барылын оҥорбут дьокутааттар бэлиэтээбиттэринэн, бу уларыйыы Арассыыйа олохтоохторо уопсай, орто анал эбэтэр үрдүк үөрэхтэнэллэрин ситиһэр туһуттан оҥоһуллубут.

Дьокутааттар бу уларыйыыны эһиилгиттэн саҕалаан түһүмэҕинэн киллэриэххэ диэн этэллэр. Сокуон барылынан, 2024 сылга 19 саастарыттан 30-гар диэри, 2025 сылга – 20-30, 2026 сылга 21-30 саастарыгар диэри ыҥырыллыахтаахтар.