Ааспыт сууккаҕа 12 ойуур баһаарын умуруордулар

Ааспыт сууккаҕа баһаары утары охсуһааччылар 5400 гаа иэннээх 12 ойуур баһаарын умуруордулар. Ол туһунан экология, айылҕаны туһаныы, ойуур хаһаайыстыбатын миниистирин солбуйааччы Андрей Коноплев брифиҥҥэ иһитиннэрдэ.

4 баһаары Кэбээйи улууһугар, 4 — Өлүөхүмэҕэ, 2 — Алдаҥҥа, 2 — Неюнгригэ, 1 — Сунтаарга, 1 — Уус Маайаҕа умуллардылар.

От ыйын 5 күнүн сарсыардатыгар Саха сиригэр 308 тыһыынча гаа иэннээх сиргэ 124 ойуур баһаара уонна 6 тыһыынча гаа иэннээх сиргэ  1 ландшафтнай баһаар умайар.

Бу баһаардартан Дьааҥыга, Бүлүүгэ, Ленскэйгэ, Мэҥэ Хаҥаласка, Мииринэйгэ, Өлүөхүмээҕ, Сунтаарга, Тааттаҕа уонна «Өлүөнэ очуостара» национальнай пааркаҕа барыта 530 гаа иэннээх сиргэ 14 баһаары төгүрүттүлэр.

Билигин барыта 1648 киһи, 85 тиэхиникэ уонна авиация үлэлии сылдьар.

Саха сиригэр федеральнай уонна өрөспүүбүлүкэтээҕи  таһымнаах ыксаллаах быһыы-майгы эрэсиимнэрэ салҕаналлар. Муниципальнай таһымнаах ыксаллаах быһыы-майгы эрэсиимэ Үөһээ Халыма, Нерюнгри, Уус Маайа, Томпо, Өлүөхүмэ улуустарыгар биллэриллибиттэрэ.

Маны тэҥэ, Саха сиригэр баһаары утары ураты эрэсиим биллэриллибитэ, бу чэрчитинэн, ойуурга сылдьарга хааччахтар киирбиттэрэ.