Административнай быраап туһунан сокуон чуолкайданна

Ил Түмэн онус пленарнай мунньаҕар норуот дьокутааттара «О внесении изменений в статьи 1 и 8 Закона Республики Саха (Якутия) «Об органах и учреждениях административной юрисдикции в Республике Саха (Якутия)» сокуон бырайыагын ылыннылар.

Дакылааты Ил Түмэн Судаарыстыбаннай тутууга уонна сокуону оҥорууга сис кэмитиэтин бэрэссэдээтэлэ Афанасий Владимиров оҥордо.

Докумуоҥҥа киирбит көннөрүүлэр муниципальнай тэриллии административнай хамыыһыйатын чилиэнэ, өскөтүн кини бэйэтэ административнай буруйу оҥоруу туһунан боротокуолу оҥорбут буоллаҕына, административнай буруйу оҥоруу дьыалатын көрөрө бобуллара ыйыллар. Оннук буоллаҕына, административнай быраабы көрүү дьэҥкэтик уонна сөптөөхтүк барарын мэктиэлиир диэн сокуону оҥорооччулар быһаараллар. Сокуоҥҥа юридическай уонна техническэй уларыйыылар эмиэ киирдилэр.

Сокуон барыла 2024 с. атырдьах ыйын 9 күнүнээҕи 73-08-2024/Прт—42—24—20980001 Саха Өрөспүүбүлүкэтин борокуруорун утарыытын чэрчитинэн 2009 с. алтынньы 14 күнүнээҕи 723-З № 339-IV «Об органах и учреждениях административной юрисдикции в Республике Саха (Якутия)» сокуон сорох балаһыанньатыгар уларытыы киирдэ.

Сокуон барыла бастакы ааҕыыга ылылынна.