“Аҕа дойдуга сулууспалаа!” симиэнэ үлэтин саҕалаата

Оҕо сынньалаҥын уонна доруобуйатын бөҕөргөтөр кииҥҥэ “Аҕа дойдуга сулууспалаа!” саҥа  симиэнэ саҕаланна. Симиэнэ үлэтэ үөрэнээччилэри патриотическай уонна гражданскай иитиигэ туһуланар.

Бүгүҥҥү күн устата оҕолор кэлэ тураллар, барыта 100 оҕо кэлиэхтээх.

Бу сырыыга Кииҥҥэ өрөспүүбүлүкэ 26 муниципальнай тэриллиилэриттэн кэллилэр: Алдан, Аллайыаха, Анаабыр, Амма, Үөһээ Бүлүү, Уус Алдан, Бүлүү, Горнай, Кэбээйи, Ленскэй, Мэҥэ Хаҥалас, Муома, Нам, Нерюнгри, Ньурба, Өлүөхүмэ, Өлөөн, Сунтаар, Таатта, Томпо, Уус Маайа, Усуйаана, Хаҥалас, Чурапчы, Эбээн Бытантай, Аллараа Халыма улуустарыттан, ону тэҥэ Жатайтан уонна Дьокуускай куораттан.

«Аҕа дойдуга сулууспалаа!» симиэнэ үлэтэ хас да хайысханан ыытыллар: үөрэх-билии, спортивнай доруобуйаны бөҕөргөтөр, байыаннай-патриотическай. Манна оҕо доруобуйатын бөҕөргөтүүгэ, эт-хаан өттүнэн дьоҕурун сайыннарыыга, ыксаллаах түгэҥҥэ уйулҕата туруктаах буолуутугар, сулууспаҕа эрдэттэн кэлимник бэлэмнэниигэ туһуламмыт араас тэрээһиннэр киирэллэр. Доҕордоһуу уонна аһыныгас санааны сайыннарыыга эмиэ улахан болҕомто ууруллар.

Оҕолору доруобуйаларын бөҕөргөтөр бырагыраамалар күүтэллэр – кислородтаах коктейллар, фитотерапия, ЛФК, галокамера уонна да атын араас эмтэниилэр. Үөрэтэр тэрээһиннэри таһынан “Сосновый бор” иитиллээччилэрин интэриэһинэй дьону кытта көрсүһүүлэр, култуурунай айаннар, лааҕыр бэйэтин бырагыраамалара күүтэллэр.

Симиэнэ партнердарынан «Бастакылар хамсааһыннара» Арассыыйатааҕы оҕо, ыччат хамсааһына уонна СӨ ИДьМ ГИБДД управлениета буолаллар, диэн иһитиннэрэр Ил Дархан, бырабыыталыстыба пресс-сулууспата.