Айсен Николаев Дмитрий Коркин турнирын бочуоттаах ыалдьыттарын кытта көрүстэ

Сэтинньи 15 күнүгэр «Триумф» успуорт уораҕайыгар СӨ Ил Дархана Айсен Николаев САССР, РСФСР, ССРС үтүөлээх тириэньэрэ Дмитрий Коркин аатынан норуоттар икки ардыларынааҕы көҥүл тустуу турнирыгар кэлбит бочуоттаах ыалдьыттары кытары көрүстэ.

Тэрээһиҥҥэ уос номоҕор киирбит ааттаах-суоллаах спортсменнар, сүүмэрдэммит национальнай хамаандалар тириэньэрдэрэ, успуорт судьуйалара уонна тас дойдуттан кэлбит хамаандалар бэрэстэбиитэллэрэ түмүстүлэр.

Көрсүһүү кыттыылаахтарын ортолоругар Олимпиада икки төгүллээх чөмпүйүөнэ, аан дойду уонна Европа алта төгүллээх чөмпүйүөнэ, ССРС уонна Болгария успуордун үтүөлээх маастара Сергей Белоглазов; Олимпийскай оонньуулар боруонса призердара, аан дойду уонна Европа үс төгүллээх чөмпүйүөнэ, Арассыыйа көҥүл тустууга сүүмэрдэммит хамаандатын сүрүн тириэньэрэ Денис Царгуш; Олимпийскай чөмпүйүөн, Европа чөмпүйүөнэ Магомед Рамазанов; СӨ норуот дьокутаата, Олимпийскай чөмпүйүөн Павел Пинигин; Олимпийскай оонньуулар үрүҥ көмүс призердара Александр Иванов; Бурятия Өрөспүүбүлүкэтин успуорка уонна ыччат бэлиитикэтигэр миниистири солбуйааччы, норуоттар икки ардыларынааҕы категориялаах судьуйа Эрдэм Биликтуев, уо.д.а. бааллар.

Маны сэргэ, Краснодар кыраайыттан успуорт комментатора Степан Крижановский, СӨ физическэй култууратын уонна успуордун миниистирэ Леонид Спиридонов, СӨ спортивнай тустуу федерациятын бастакы вице-бэрэсидьиэнэ Виктор Лебедев, сүүмэрдэммит хамаандалары бэлэмниир СБК дириэктэрэ Михаил Пахомов, тас дойдуттан кэлбит хамаандалар бэрэстэбиитэллэрэ Тимурбаатар Баатор уонна Наранбаатар Байараа (Монголия), Юки Такахаши (Япония), уо.д.а. кыттыыны ыллылар.

Ил Дархан Айсен Николаев ыалдьыттары эҕэрдэлээтэ, күрэхтэһии суолтатын уонна өрөспүүбүлүкэ успуордун историятыгар кинилэр ураты миэстэлэрин бэлиэтээтэ.

—Ааттаах-суоллаах тустууктары, тириэньэрдэри уонна тустууну сөбүлээн көрөөччүлэри Коркин 16 төгүлүн ыытыллар  турнирынан эҕэрдэлиибин. Бу күөн күрэһи өрө көтөҕүллүүлээхтик ыытабыт. Биһиэхэ 11 араас дойдуттан уонна Арассыыйа 12 эрэгийиэниттэн сүүмэрдэммит күүстээх хамаандалар кэллилэр. Көбүөргэ хапсыһыы ураты буоларыгар эрэнэбин. Турниры тэрийэргэ көмөлөспүт дьоммутугар, түһүлгэҕэ кытта кэлбит спортсменнарга уонна судьуйаларга махтанабын. Саха сирин дьонугар-сэргэтигэр көҥүл тустуу — инники күөҥҥэ тутуллар успуорт көрүҥүнэн буолар. Көбүөргэ тахсар эдэр көлүөнэ үүнэн-сайдан үрдүк ситиһиилэрдээх буоларыгар эрэнэбин. Далааһыннаах күрэхтэһии барыбытын түмэр, сомоҕолуур. Күрэхтэһиигэ тырыбыналар куруук толору буола туралларыгар баҕарабын, — диэн бэлиэтиир Ил Дархан.

Кини маны сэргэ, Дмитрий Петрович Коркин төрөөбүтэ 100 сылыгар аналлаах үбүлүөйдээх тэрээһиннэри бэлэмнээһиҥҥэ уонна ыытыыга тэрийэр кэмитиэт тэриллэригэр дьаһалга илии баттаммытын туһунан эмиэ иһитиннэрдэ.

—Саха сиригэр тустуу сайдарыгар сүдү кылаатын киллэрбит, аан дойдуга спортивнай тустуу сайдыытыгар  дьоһуннаах үлэни ыыппыт ытык киһибит үйэлээх үбүлүөйүн 2028 сылга киэн тутта бэлиэтиэхпит, — диэтэ Айсен Николаев.

Олимпийскай оонньуулар икки төгүллээх чөмпүйүөннэрэ Сергей Белоглазов тэрээһини үрдүктүк сыаналаата уонна эдэр спортсменнарга өйөбүлү тоһоҕолоон бэлиэтээтэ.

Санатан эттэххэ, Дмитрий Коркин турнира сэтинньи 14-16 күннэригэр ыытыллар. Күрэхтэһии түһүлгэтигэр уонтан тахса дойду бэрэстэбиитэллэрэ кэллилэр. Австралияттан, Кубаттан, Кыргызстантан, Монголияттан, Таджикистантан, Соҕуруу Кореяттан, Японияттан, Арассыыйа эрэгийиэннэриттэн уопсайа 200 спортсмен күөн көрсөр.

Сиһилии: https://www.sakha.gov.ru/news/15484

СӨ Ил Дарханын уонна Бырабыыталыстыбатын пресс-сулууспата