Салгыы
Айсен Николаев: Элбэх оҕолоох уонна оҕолору иитэ ылар ыаллары өйүүбүт

Айсен Николаев: Элбэх оҕолоох уонна оҕолору иитэ ылар ыаллары өйүүбүт

Ааптар:
16.10.2022, 10:23
Бөлөххө киир:

Ытыктабыллаах Саха сирин дьахталлара, күндү ийэлэр!

Өрөспүүбүлүкэ салалтатын уонна тус бэйэм ааппыттан Саха Өрөспүүбүлүкэтин Ийэлэрин күнүнэн ис сүрэхпиттэн эҕэрдэлиибин!

Биһиги элбэх омуктаах өрөспүүбүлүкэбит 100 сылынан – 2022 сылы Ийэ сылынан биллэрбиппит түбэспиччэ буолбатах. Биһиги норуоппут историята, хас биирдиибит историята саамай чугас киһибититтэн – ийэбититтэн саҕаланар. Ийэ оҕотугар үтүө санааны, сиэрдээх буолууну, Ийэ дойдуга, төрөөбүт алааска тапталы, дьоҥҥо-сэргэҕэ ытыктабыллаах сыһыаны иҥэрэр. Ийэ биһигини айарга-тутарга үөрэтэр-такайар, олоххо бастакы хардыыбытын ыйан-кэрдэн биэрэр. Биһиэхэ сылаас-сымнаҕас сыһыанын, уҕараабат кыһамньытын иһин киниэхэ муҥура суох махтанабыт.

Биһиги өрөспүүбүлүкэбитигэр дьиэ кэргэн, ийэ буолуу уонна оҕо саас көмүскэлигэр үгүс үлэ ыытыллар.

Үбүлүөйдээх сылга төрөөбүт хас биирдии оҕо “Сүүс сыл оҕото” тус сыаллаах 100 тыһыынча солкуобайдаах хапытаалы ылар.

Бүгүн итинник тус сыаллаах хапытаал 6,8 тыһыынчаттан тахса ыалга туттарылынна. 1446 ыал ити үбү тутунна.

Быйыл болҕомтобутун өссө биир дьоһун сорукка – биһиги дьахталларбыт доруобуйаларыгар кыһамньыга уурдубут. Доруобуйаны эрдэттэн көрдөрүү, дьахтар оҕолонор уорганын ыарыытын кыччатыы, оҕолоноору сылдьар дьахталлар диспансеризацияларын хаачыстыбатын күүһүрдүү, искэн ыарыытын сэрэтии. Дьахтар консультациятыгар уонна перинатальнай кииннэргэ оҕолоноору сылдьар дьахталлар, оҕолорун эмтэрэр ийэлэр, биирдэрин туола илик оҕолор, эдэр ийэлэр аһылыктарын оскуолалара тэрилиннэ. Медицинскэй тэрилтэлэргэ дьахтар доруобуйатыгар уонна кэрэ сэбэрэтигэр аналлаах Аһаҕас аан күннэрэ, акциялар ыытыллаллар.

Биһиги элбэх оҕолоох уонна оҕолору иитэ ылар ыаллары өйүүбүт. Оҕону иитэ ылбыт төрөппүккэ оҥоһуллар төлөбүр базовай кээмэйин икки төгүл улаатыннарары көрөр Саха Өрөспүүбүлүкэтин сокуона 2022 сыл бэс ыйын 14 күнүгэр ылыллыбыта. Ийэ сылыгар култуура уонна успуорт тэрилтэлэригэр 3 уонна 4 оҕолоох элбэх оҕолоох ыалларга 50 бырыһыан кээмэйдээх чэпчэтиилэри оҥорор, оттон 5 уонна онтон элбэх оҕолоох ыаллары  босхо сырытыннарар туһунан дьаһалы ылыммытым.

Волонтердар “Ийэҕэ көмөлөһүөххэ” хамсааһыннарыгар куораттар уонна сэлиэнньэлэр олохтоохторо көхтөөхтүк кытталлар, элбэх оҕолоох уонна аҥаардас ийэлэргэ аадырыстаах көмөнү оҥороллор.

Дьокуускайга Дьиэ кэргэҥҥэ уонна оҕоҕо социальнай көмөнү оҥоруу киинэ үс сыл устатыгар тутуллан үлэҕэ киириэҕэ. Маны тэҥэ, улуустар ийэ буолууну өйүүр эбии дьаһаллары ылыналлар.

Дьарыктаах буолуу сулууспаларын көмөлөрүнэн дьахталлар саҥа идэни баһылыыллар, эбии идэни ылаллар. Хас биирдии дьахтар ийэ эрэ быһыытынан буолбакка, талбыт эйгэтигэр идэлээх үлэһит быһыытынан ис кыаҕын арыйарыгар усулуобуйа баар буолуохтаах.

Оччоҕуна эрэ кини оҕолорун тустаах идэни баһылыырга, айарга-тутарга уһуйуоҕа.

Дойдуга ыар кэм тирээн кэллэҕинэ, ийэлэрбит биһиги санаабытын көтөҕөллөр, күүспүтүгэр күүс угаллар. Дойдубут эйэлээх кэскилин көмүскүү барбыт биир дойдулаахтарбыт дьиэ кэргэннэригэр көмөлөһөр – билиҥҥи уустук кэмҥэ биһиги уопсай ытык иэспит. Аҕа дойдуну көмүскээччилэр дьиэ кэргэннэрин өрөспүүбүлүкэ өйүүр! Биһиги дьахталларбыт ис сүрэхтэриттэн уолаттарга көмөлөһөллөр, самныбат санааны кынаттыыллар.

Ийэлэрин тапталлара, эрэллэрэ уолаттарбытыгар күүһү угар, эрчими эбэр. Биһиги бары моһоллору туоруохпут уонна кыайыахпыт диэн бигэ эрэллээхпин!

Күндү ийэлэр! Эһиэхэ чэгиэн доруобуйаны, дьолу уонна этэҥҥэ буолууну баҕарабын. Оҕолоргут сылаас сыһыаннарынан, ситиһиилэринэн эһигини мэлдьи үөрдэ сырыттыннар.

Саха Өрөспүүбүлүкэтин Ил Дархана Айсен Николаев

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
28 марта
  • -13°C
  • Ощущается: -20°Влажность: 40% Скорость ветра: 6 м/с

Сообщить об опечатке

Текст, который будет отправлен нашим редакторам: