Айсен Николаев Н.Н. Бурденко аатынан госпиталга эмтэнэр Саха сирин байыастарын көрүстэ

Ил Дархан Айсен Николаев ахсынньы 12 күнүгэр Москваҕа Н.Н.Бурденко аатынан Сүрүн байыаннай клиническэй госпиталга сырытта.

Госпиталга Алдан, Мииринэй, Таатта, Усуйаана оройуоннарыттан сылдьар байыастар эмтэнэ сыталлар. Көрсүһүү кэмигэр бойобуой сырыыларын кылгастык ахтан аһардылар, Саха сирин сонуннарын ыйыталастылар, доруобуйаларын туругун кэпсээтилэр. Уолаттар санаалара самныбатаҕын, бары кыайыыга дьулуурдаахтарын, эрэллээхтэрин тиэртилэр.

Усуйаана улууһуттан төрүттээх байыас госпиталь быраастарыгар, бары үлэһиттэригэр улахан үлэлэрин, кыһамньыларын иһин махталын биллэрдэ.

“Арассыыйа Сэбилэниилээх Күүстэригэр бэйэм баҕабынан барбытым уонна Угледар анныгар буолбут кыргыһыыга бааһырбытым. Бурденко аатынан  госпитальга түргэнник тиэрдибиттэриттэн үөрэбин. Барыта үчүгэй, дьиэ кэргэним сибээскэ баар, төлөбүрү барытын ыллым”, — диир байыас.

Ил Дархан Горнай улууһун Бэс Күөл нэһилиэгиттэн сылдьар, дьиҥнээх күүстээх санаа, тулуур бэлиэтинэн буолбут Александр Федоровы кытта истиҥник кэпсэттэ. Кини устуоруйата Арассыыйа үгүс олохтооҕун долгуппат. Атахха ыараханнык бааһыран баран, 17 күн окуопаҕа сыппыт. Тыыннаах хаалар туһугар, атаҕын быһаҕынан бэйэтэ быспыт. Александр хас да эпэрээссийэни ааһан, билигин үтүөрэн эрэр.

“Аҕа дойду көмүскэлигэр турунан, эһиги туох кыаллары барытын оҥордугут. Өрөспүүбүлүкэ өттүттэн наадалаах көмө, ол иһигэр протеһы оҥорторуу, реабилитацияны ааһыы, барыта оҥоһуллуоҕа. Үтүөрэн, дойдугутугар төннүҥ”, — диэтэ Айсен Николаев.

Саха сириттэн сылдьар бааһырбыт байыастар Саҥа дьыллааҕы бэлэхтэри туттулар, диэн иһитиннэрэр Ил Дархан, Бырабыыталыстыба пресс-сулууспата.