Айсен Николаев РФ Госсэбиэтин Президиумугар оннунан хаалла

РФ Бэрэсидьиэнэ Владимир Путин дьаһалынан Госсэбиэтин Президиумун састаабын бигэргэттэ. Ил Дархан, «Энергетика» хайысханан Госсэбиэтин хамыыйатын бэрэссэдээтэлэ Айсен Николаевы Президиумҥа миэстэтигэр оннунан хаалларда.

Дойду премьер-миниистирэ Михаил Мишустины, Бэрэсидьиэн көмөлөһөөччүтэ, Госсэбиэтин сэкирэтээрэ Алексей Дюмины, Бэрэсидьиэн дьаһалтатын салайааччытын бастакы солбуйааччы Сергей Кирилленконы кытта Президиум састаабыгар кэккэ губернатордар киирдилэр.

Президиумҥа губернатор куорпуһун аҥарын кэриэтэ Арктика уонна Уһук Илин эрэгийиэннэрин баһылыктара бааллар. Ол иһигэр уһук илиннэр — Олег Кожемяко, Приморскай кыраай губернатора, «Туризм» Госсэбиэтин хамыыһыйатын баһылыга, Валерий Лимаренко, Сахалин уобалаһын губернатора, «Инвестиция» Госсэбиэтин хамыыһыйатын баһылыга, Алексей Цыденов, Бурятия Өрөспүүбүлүкэтин баһылыга, «Көдьүүстээх тырааныспар тиһигэ» ГосСэбиэтин хамыыһыйатын баһылыга.

Аны Госсэбиэтин Президиумун түөрт чилиэннэрэ хотугу эрэгийиэннэр баһылыктара буолаллар. Бу Дмитрий Артюхов, ЯНАО баһылыга, «Ыччат уонна оҕо» Госсэбиэтин хамыыһыйатын баһылыга, Михаил Котюков, Красноярскай кыраай губернатора, «Технологическай лидерство» Госсэбиэтин хамыыһыйатын баһылыга, Александр Цыбульскай, Архангельскай уобалас губернатора, «Аан дойдутааҕы кооперация уонна экспорт» губернатора, Андрей Чибис, Мурманскай уобалас губернатора, «Хотугу муора суола уонна Арктика» Госсэбиэтин хамыыһыйатын баһылыга.

Санатан эттэххэ, Айсен Николаев ааспыт сыл от ыйыгар РФ Бэрэсидьиэнэ Владимир Путин ыйааҕынан «Энергетика» хайысханан Госсэбиэтин хамыыһыйатын бэрэссэдээтэлинэн анаммыта.
Билигин «Энергетика» хайысханан Госсэбиэтин хамыыһыйата 136 чилиэннээх. Онно Российскай Федерация 64 субъегын бэрэстэбиитэллэрэ, ол иһигэр 17 эрэгийиэн баһылыктара киирэллэр.