«Айтал уонна аптаах күүс» ойуулук оҕолору түмтэ

Бэс ыйын 5 күнүгэр Дьокуускай куорат «Лена» киинэ тыйаатырыгар «Тооку» оҕо ханаалын биир сааһын көрсө «Айтал уонна аптаах күүс» ойуулук күүтүүлээх  премьерата буолла.

Ойуулук ойуулаах бирээнньиктэри, аптаах күүс наклейкаларын кэлбит хас биирдии кырачаан ыалдьытыгар бэлэх ууннулар. «Тооку» сакалааттара, кырааскалыыр сурунааллара үгүс дьон болҕомтотун тартылар.

Ойуулугу оҥорон таһаарбыт хамаанда эдэрэ уонна көхтөөҕө сөхтөрдө. Режиссердар Дарья Гольдерова уонна Мария Константинова, ойуулук сценарийын Саргылаана Сандаар, продюсер Анна Кириллина, о.д.а бары сыанаҕа тахсан бар дьоҥҥо ойуулук саҕаланыан иннинэ көстөн көрөөччүллэри үөртүлэр.

Ойуулугу оҕолор биир тыынынан олорон көрбүттэрин сэргээтим. Бу тула ойуулугу көрбүт оҕолор санааларын үллэһиннилэр:

Күбэйэ 8 cаастаах:

—  Ойуулук ойуулаах наклейканы киирэн истэхпинэ илиибэр сыһыарбыттарыттан, бирээнньик биэрбиттэриттэн үөрдүм. Мин ойуулукка баар абааһыттан куттанным. Ойуулук дьоруойдарыттан Айталы, Эрчими, Сайыынаны наһаа сөбүлээтим. Мин сахалыы мультигы бастакыбын көрдүм.

Сандаара, 7 cаастаах:

-Ойуулугу астынным аҕай. Ийэм миэхэ «Тооку» сакалаатын уонна сурунаалын атыыласта. Сайыынаны уонна Айталы сөбүлээтим. Ойуулук салгыытын күүтэбин.