Альберт Петров — көҥүл тустууга Арассыыйа чөмпүйэнээтин призера!

Саха сирин сүүмэрдэммит хамаандатын тустууга Альберт Петров кулгаахтарынан мөлтөхтүк истэр спортсменнар ортолоругар көҥүл тустууга Арассыыйа чөмпүйэнээтин боруонса мэтээлинэн наҕараадаланна.

Күрэхтэһии Каспийск куоракка буолан ааста. Бу туһунан «Триумф» пресс-сулууспата иһитиннэрэр.

Дойду чөмпүйэнээтигэр 100 бөҕөс 21 эрэгийиэнтэн күөн көрүстэ. Оттон Альберт Петров тустубут 57 кг ыйааһыҥҥа барыта тоҕус спортсмен кииристэ.

Бастакы хапсыһыыга саха спортсмена Дагестантан Махач Махмудовка хотторбута. Оттон дьоҕус финалга 27 саастаах Альберт Петров Бурятияттан Санжи Жаловы кыайан, чөмпүйэнээт боруонса мэтээлин ылары ситистэ.

Алексей Васильев (92 кг) төрдүс, Егор Скрябин (61 кг) уонна Евгений Мухамедзянов (65 кг) бэһис миэстэлэри ыллылар.