«Газпром» ПАУо кытта бииргэ үлэлэһэр буоламмыт, Алдаҥҥа хаҥкылыыр сирдээх аныгы бэртээхэй спортивнай комплекс тутулунна. Аныгы спортивнай эбийиэктэр бу күннэргэ Нерюнгри оройуонугар Чульмаҥҥа уонна Марха бөһүөлэгэр аһыллыахтара. Алдан спорт кыһыҥҥы көрүҥүгэр мэлдьи инники күөҥҥэ сылдьар. Манна 1966 сыллаахха хоккейга САССР батакы чөмпүйэнээтэ ыытыллан турар.
Маннык саҥа спортивнай эбийиэктэр тутуллаллара Арассыыйа спордугар саҥа сулустар, чөмпүйүөннэр иитиллэн тахсалларыгар, кинилэр дойдубут бастыҥ хамаандаларыгар киирэллэригэр төһүү буолуо«, — диэн бэлиэтээтэ Айсен Николаев. Итинник этэн баран Ил Дархан Өрөспүүбүлүкэ судаарыстыбаннай наҕараадаларын туттарда. Саҥа спортивнай эбийиэк тутуллуутугар СӨ Ил Дарханын махтал суруктарын «Газпром» социальнай көҕүлээһиннэри өйүүр пуонда кэлэктиибэ уонна бэдэрээччиттэр — «Межрегионгаз Технологии» уонна «Геолайн Технологии» хампаанньалар туттулар.
«Газпром» ПАУо социальнай көҕүлээһиннэри өйүүр пуонда генеральнай дириэктэрин сүбэһитэ Николай Кузьмичев «Газпром — оҕолорго» бырагыраама, бөдөҥ социальнай бырайыактарыттан биирдэстэрэ буоларын, дойду 74 эрэгийиэнин хабарын, онно тыһыынчаттан тахса эбийиэк тутуллубутун сырдатта. Кини Ил Дархаҥҥа, СӨ Бырабыыталыстыбатыгар, оройуон уонна куорат салалталарыгар көдьүүстээх үлэлэрин иһин махтанна.
Алдан оройуонун баһылыга Александр Шестопалов оройуоҥҥа хоккейдыыр дьиэни-уоту тутууга уонна оҕо хоккейын сайдыытын саҕахтарыгар турбут энтузиаст-спортсмен Андрей Герасимов дьыалатын эдэр көлүөнэ салгыырыгар эрэнэрин биллэрдэ.
Катогу арыйыыга бастакы шайбаны СӨ Ил Дархана Айсен Николаев, Алдан куоратын «Металлург» хоккей хамаандатын капитана Сергей Климас уонна Аллараа Кураанах бөһүөлэгиттэн «Полюс» хамаанда капитана Александр Амиров оҕустулар.
Санатан эттэххэ, бу «Газпром — оҕолорго» бырагырааманан 2022 сылга түмүктэнэн үлэҕэ киллэриллиэхтээх физкультуралыыр, доруобуйаны чэбдигирдэр үс комплекстан биирдэстэрэ. Иккис эбийиэк бу күннэргэ Нерюнгри оройуонугар Чульман бөһүөлэгэр киириэхтээх. Үһүс, сөтүөлүүр бассейннаах уонна катоктаах саамай улахан комплекс Дьокуускай таһыгар Марха бөһүөлэгэр тутулунна. Бу комплекс быйыл эмиэ үлэҕэ киириэхтээх.