Александр Ильин: «Өрөспүүбүлүкэ болуоссатын тэрийиигэ олохтоохтор санааларыгар тирэҕирэбит»

Дьокуускай куорат Дууматын 5 №-дээх Студенческай биир мандааттаах быыбардыыр уокуругун дьокутаата Александр Ильин санаатын кытта үллэстэр:

«Дьокуускайга Өрөспүүбүлүкэ болуоссатын тэрийэр туһунан быһаарыы ылынарбытыгар биһиги тыһыынчанан куорат олохтоохторун санааларыгар тирэҕирэбит. Сөптөөх юридическай хамсааһыннар, экспертнэй уонна уопсастыбаннай дьүүллэһиилэр ыытыллыбыттара. Бу этиини өйүүргэ олохтоохтортон илии баттааһыннар хомуллубуттара. Быыбардааччылар үксүлэрэ Ленин болуоссата оннунан хааларын учуоттаан, Өрөспүүбүлүкэ болуоссата баар буоларын туруорсубуттара саарбахтаммат.

Бу боппуруоска сорох дьон туруорсарын курдук, референдум тэрийэри көрбөппүн. Референдуму ыытарга бары учаастактааҕы быыбардыыр хамыыһыйалар арыллыахтаахтар, хамыыһыйа чилиэннэригэр хамнас төлөнүөхтээх, видео камеранан устуу, о.д.а. тэриллиэхтээх. Барыллаан ааҕыынан, итиннэ 60 мөл. солк. тахса харчы көрүллүөхтээх. Ити үбү-харчыны ол оннугар нэһилиэнньэҕэ анаан тупсарыыга, социальнай эбийиэктэри тутууга, суолу оҥорууга уонна өрөмүөннээһиҥҥэ бырайыактыыр-симиэтэлиир докумуоннары бэлэмнээһиҥҥэ уонна да атын хайысхалаах соруктарга ыытыахха».