Алексей Еремеев: «Бүддьүөтү оҥорууга сөптөөх быһаарыныыны ылынныбыт дии саныыбын»

Бүгүн Ил Түмэн уочараттаах мунньаҕар 41 боппуруоһу көрдүлэр. Билиҥҥи уустук балаһыанньаҕа СӨ 2026 сыллааҕы бүддьүөтэ ылылынна. Ол туһунан уонна парламент сиэссийэ хайдах ааспытын туһунан Ил Түмэн спикерэ Алексей Еремеев санаатын үллэстэр:

— Бүгүн Ил Түмэн 15 уочараттаах пленарнай мунньаҕар 41 боппуруос көрүлүннэ. Олус улахан суолталаах боппуруостар буолаллар, ол иһигэр өрөспүүбүлүкэ 2026, 2027, 2028 сыллаах былааннаах кэмигэр судаарыстыбаннай бүддьүөт ылылынна. Ону сэргэ кэлэр үс сылга булгуччулаах мэдиссиинэ страховкалааһынын территориальнай пуондатын бүддьүөтүн боппуруостарыгар тохтуохпун баҕарабын, сүдү үлэ барда, ааспыт 14-с пленарнай мунньах кэнниттэн бүгүҥҥэ диэри сөбүлэһиннэрэр хамыыһыйалар сыралаахтык, өрөбүлэ суох үлэлээтилэр. Тиһэҕэр биһиги биир сүрүҥҥэ кэлэммит өрөспүүбүлүкэ судаарыстыбаннай бүддьүөтүн ылынныбыт. Үөрүүлээҕэ, биһиги саҥа сылга судаарыстыбаннай бүддьүөтэ ылынынан киирэн эрэбит. Биллэн турар, ыарахаттардаах буолуо, ол гынан баран биһиги сөптөөх быһаарыныыны ылынныбыт дии саныыбын. Бастатан туран, хамнаһы төлөөһүн. Ити барыта өрөспүүбүлүкэ социальнай эбэһээтэлистибэтин төлөөһүнэ уонна, биллэн турар, бастакы сыаллаах хайысхалар буолуохтара. Тыа хаһаайыстыбатын салаатын өйөөһүҥҥэ, хомунаалынай тиһикпитин өйөөһүҥҥэ уо.д.а. Кинилэр бары бүддьүөккэ көрүлүннүлэр. Биир сүрүн суолталаах боппуруоһунан, биллэн турар, олохтоох салайыныы туһунан сокуон буолар. Биһиги бастакы ааҕыыга көрбүппүт. Сокуон барыла өссө сыл саҕаланыытыгар оҥоһуллубута, сайын устата норуот дьокутааттарын улахан бөлөҕүнэн уһуннук оҥоһуллан бэлэмнэммитэ, алтынньы 27 күнүгэр киллэриллибитэ. Биһиги бу сокуон бырайыагын оҥорорбутугар, тус бэйэм салалтабынан уонна сис кэмитиэт бэрэссэдээтэлэ Владимир Прокопьев салайааччылаах бөлөхтөрүнэн элбэх муниципалитекка сырыттыбыт. Оройуоннарга сылдьан бэйэбит санаабытын эппиппит, быһаарбыппыт, өрөспүүбүлүкэ нэһилиэнньэтин, уопсастыбаннаһын, дьокутааттарын, бэрэстэбиитэллээх уорганнарын, муниципальнай тэриллиилэр баһылыктарын этиилэрин истибиппит. Ол барыта үтүө түмүктээх буолла. Сүнньүнэн, өрөспүүбүлүкэ нэһилиэнньэтин үксэ бу сокуон бырайыагын концептуальнай өттүнэн өйүүр. Биһиги ону 1-кы ааҕыыга ылыммыппыт уонна ахсынньы ыйга бэрэстэбиитэллээх уорганнар 3 сийиэстэригэр дьүүллэһии кэнниттэн, сокуон көҕүлээһинин субъектара дьүүллэһии кэнниттэн киллэриэхтээх. Былаан быһыытынан сокуон бу бырайыага ахсынньы 24, 25 күннэригэр буолар 16 пленарнай мунньахха бүтэһиктээх ааҕыыга ылыныахпыт.