Алексей Еремеев Үрүҥ Тунах ыһыаҕынан эҕэрдэлиир
![](https://sakha-sire.ru/wp-content/uploads/2024/06/89-3-900x596.jpg)
Эһигини Ил Түмэн уонна тус бэйэм ааппыттан Үрүҥ Тунах ыһыаҕынан эҕэрдэлиибин!
Ыһыах диэн биһиэхэ, сахаларга, Айылҕа оҕолоругар үйэлэр түгэхтэриттэн илдьэ кэлбит биир сүдү итэҕэлбит, сиэрбит-туоммут, сир-дойду иччилэригэр, айыыларбытыгар сүгүрүйэр ытык кэммит буолар.
Былыр алаас-алааһынан, уус-ууһунан бары тѳбүрүѳннээн мустан, кырыа кыһыннаах кыстыктара бүппүтүнэн, этэҥҥэ күөххэ үктэммиттэринэн окко киириэхтэрин иннинэ ыһыах ыһаллара. Самаан сайыны, сир-дойду силигилии ситэн-симэнэн турар кэмин үѳрэ-кѳтѳ кѳрсѳн уонна онтон күүс-сэниэ ылан, айылҕаттан алгыстанан бу ытык сиэрбитин-туоммутун илдьэ кэлбиппит омук быһыытынан уратыбытын, күүстээх ис турукпутун, чиҥ тирэхпитин көрдөрөр.
Күндү биир дойдулаахтарым, быйыл дойду үрдүнэн сүрдээх уустук кэмҥэ олоробут. Халаан алдьархайын туоратыы, анал байыаннай дьайыыга дойдубут чиэһин көмүскүү сылдьар уолаттарбытыгар көмөнү оҥоруу – сүрүн сорук быһыытынан турар. Кинилэргэ бары өттүнэн көмө буолуу – барыбыт тулхадыйбат ытык иэспит. Өрөспүүбүлүкэ салалтата, дьоно-сэргэтэ, улуустар бары бииргэ түмсэн, сомоҕолоһон туора турбакка кыах баарынан көмөлөһөллөр, өйүүллэр. Түгэнинэн туһанан, кинилэргэ дириҥ махталбын тиэрдиэхпин баҕарабын. Бу барыта дьоммут-сэргэбит түмсүүлээҕин, ис туруга сырдыгын, бигэ тирэхтээҕин көрдөрөр.
Ыһыах, оһуохай – Саха Сиригэр олорор бары норуоттары түмэр, сомоҕолуур, хас биирдии олохтоох омук кутун-сүрүн бөҕөргөтөр, арчылыыр сүҥкэн суолталаах ытык тэрээһин. Онон ыһыаҕы хас биирдии саха киһитэ итэҕэл быһыытынан сиэри-туому толорон көрсүөҕүҥ, итэҕэл күүһэ барыта түмүллэн дьоҥҥо-сэргэҕэ тиийэрин, быстах кэмнээх хомуурга Аҕа дойдуларын көмүскүү сылдьар уолаттарбытын арчылыырын, алгыырын ситиһиэҕиҥ!
Бар дьоммор чэгиэн-чэбдик туругу, инникитин да түмсүүлээх буолууну, быйаҥнаах сайыны, кэхтибэт күөх илгэни, эйэлээх халлааны баҕарабын!
Ил Түмэн Бэрэссэдээтэлэ Алексей Еремеев
Сообщить об опечатке
Текст, который будет отправлен нашим редакторам: