Аллараа Бэстээххэ хонтуруоллуур эриэйдэлэр үлэлэрэ саҕаланна

Бу күннэргэ Өлүөнэ өрүһүнэн массыыналар сырыылара бобуллан, Аллараа Бэстээххэ хонтуруоллуур үлэлэр саҕаланнылар. 

Ол курдук, бу үлэҕэ  административнай хамыыһыйа, дьоҕус суудуналар судаарыстыбаннай уонна суолга куттал суох буолуутун хонтуруоллуур иниспиэксийэлэр кыттыылаах биэдэмистибэлэр икки ардыларынааҕы Мэҥэ Хаҥалас улууһунааҕы хамыыһыйа эриэйдэ үлэтин саҕалаата. Үлэ хаамыытын улуус борокуруора Михаил Слепцов  билистэ.

Мэҥэ Хаҥалас улууһун дьаһалтатын пресс-сулууспата иһитиннэрбитинэн, Аллараа Бэстээх биэрэгэр бобулаах суолга тахсар массыыналары түһэрэр анал хаамыра үлэлиир. Онон быраабыланы кэспит суоппардарга тута ыстараап олохтонор. Кээмэйэ:  физическэй сирэйдэргэ 3000-5000 солк., дуоһунастаах сирэйдэргэ 20000–50000 солк., юридическэй сирэйдэргэ 100000 солк.–1 мөл.солк. диэри.

Такси өҥөтүн оҥорон дьон олоҕор кутталы үөскэтэр суоппардарга холуобунай дьыала тэриллиэн сөп. Бу күнтэн салгын олбохтоох суудуналар сырыыларын саҕалаатылар. Бүгүҥҥү күҥҥэ сыаналара —  2000 солк. «Хивустар» сарсыарда 7 чаастан киэһэ 19 чааска диэри үлэлииллэр.