АЛРОСА Саха сиригэр социальнай эбийиэктэри тутарга хайдах көмөлөһөрүй?

Билигин Саха сиригэр барытыгар тутуу үлэтэ киэҥ хабааннаахтык ыытыллар. Суоллар, муосталар, олорор дьиэлэр, уһуйааннар, оҕо былаһааккалара,  оскуолалар, Култуура кииннэрэ, успуорт араас эбийиэктэрэ тутуллаллар.

Саха сирин хас биирдии олохтооҕо үчүгэй усулуобуйаҕа олоруон, сынньаныан, бириэмэтин туһалаахтык атаарыан баҕарар.
АЛРОСА өрөспүүбүлүкэҕэ барытыгар социальнай эбийиэктэри тутууга көхтөөхтүк кыттар. Хампаанньа эрэгийиэн бүддьүөтүгэр дивиденнэри уонна нолуоктары төлөөн өйүүр эрэ буолбакка, спонсорскай хантараактары, бэйэ социальнай бырайыактарын оҥорор уонна Саха сирин Үүнэр көлүөнэ тус сыаллаах пуондатыгар баҕа өттүнэн үбү ыытар.
АЛРОСА социальнай бырагыраамаларга сыл аайы бэйэтэ киллэрбит үбүттэн ортотунан  5 бырыһыаны ыытан, социальнай инвестицияларга ураты болҕомтону уурар. Хампаанньа сыл аайы 10 миллиард суумалаах социальнай уонна аһымал көҕүлээһиннэри олоххо киллэрэр.
Саха сирин Ил Дархана Айсен Николаев бэлиэтииринэн, АЛРОСА Саха сирин олоҕор кыттыыта өрөспүүбүлүкэ социальнай-экэнэмиичэскэй сайдыытын биир сүрүн драйверынан уонна социальнай инвестицияларга инники иһээччинэн буолар.
Хампаанньа  инфраструктура бырайыактарын өйөөн, олохтоох холбоһуктар этэҥҥэ буолалларыгар улахан болҕомтону уурар. Ол курдук, АЛРОСА 2011 сылтан Үүнэр көлүөнэ тус сыаллаах пуондатыгар 8 миллиартан ордук үбү ыытта. Бу үп суотугар өрөспүүбүлүкэ 30 улууһугар 40 эбийиэк -– оскуолалар, оҕо уһуйааннара, успуорт уонна култуура эбийиэктэрэ, балыыһалар, доруобуйаны чөлүгэр түһэрэр кииннэр уонна олорор дьиэлэр тутулуннулар. АЛРОСА инникитин бэйэтигэр ылыммыт эбэһээтэлистибэлэрин толорор былааннаах, өрөспүүбүлүкэҕэ социальнай бырайыактар бары олоххо киллэриллиэхтэрэ.

«Эбийиэктэри тутуу Үүнэр көлүөнэ тус сыаллаах пуондатын  биир дьоһуннаах хайысхатынан  буолар. Үөһээ этиллибиттэртэн ураты биир сүрүнүнэн өрөспүүбүлүкэ стратегическай бырайыагын олоххо киллэрии -– Дьокуускай куоракка Үүнэр көлүөнэ пааркатын тутуу буолар. Тутууну сэргэ,  пуонда бу эбийиэктэри көрүүгэ-истиигэ улахан болҕомтотун ууруоҕа. Биһиги оҕолор уонна ыччат наадалаах дьоҕуру ылалларын уонна Саха сирин экэниэмикэтин дьоһун суолталаах салааларын кэскиллээхтик сайыннарыыга  бигэ тирэх буоларын ситиһиэхтээхпит», -– диэн СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров иһитиннэрдэ.

АЛРОСА үбүнэн өйөбүлүнэн өрөспүүбүлүкэҕэ барытыгар социальнай эбийиэктэр сыл аайы тутуллаллар. Бу үлэлэр географиялара Мииринэй оройуонунан уонна алмаастаах түөлбэлэринэн эрэ муҥурдаммат, эбийиэктэр Саха сиригэр барытыгар тутуллаллар. Быйыл Нам улууһун Нам сэлиэнньэтигэр Култуура уонна духуобунай сайдыы киинэ аһыллара күүтүллэр.
Саҥа дьиэҕэ 400 көрөөччүгэ миэстэлээх Култуура дыбарыаһа, ЗАГС улуустааҕы салаата, кыраайы үөрэтэр мусуой, хартыына галереята, оҕолор уонна улахан дьон ааҕар саалалардаах бибилэтиэкэ баар буолуохтара. Саҥа дыбарыас улуус култуурунай-духуобунай олоҕун киининэн буолуоҕа.
«Дыбарыас национальнай култуура улахан комплексын сүрүн эбийиэгинэн буолуоҕа. Дыбарыас аттыгар саха уһулуччулаах бэйиэтэ Илья Винокуров-Чаҕылҕан түмэлэ, Максим Аммосов аатынан болуоссат баар буолуохтара.
Олохтоохтор бары бу үөрүүлээх күнү тулуйбакка күүтэллэр, бу бырайыак, кырдьыга да, өрөспүүбүлүкэ салалтата, муниципальнай оройуон, Пуонда уонна АЛРОСА хамаанданан улахан үлэни ыыппыттарын көрдөрөр. Барыларыгар өйөбүллэрин иһин махтанабыт», — диэтэ Нам улууһун баһылыга Юрий Слепцов. 

Олег ШИЛОВ суруйуутуттан тылбаас