Алтынньыга Ленин пааматынньыга миэстэтигэр төннүөҕэ

Дьокуускай куоракка Ленин болуоссатыгар устуоруйа кэрэһитэ буолан турбут В.И.Ленин пааматынньыга өрөмүөн ыытылларынан сибээстээн көһөрүллүбүтэ. Киин куорат аҕам саастаах олохтоохторо улуу киһи өйдөбүнньүгэ миэстэтигэр төттөрү туруорулларын туруорсубуттара ыраатта.

Бу күннэргэ Дьокуускай куорат баһылыга Евгений Григорьев М.Е.Николаев аатынан Мэдиссиинэ национальнай киинин кэллэктиибин кытары көрсүһэригэр алтынньы ыйга Ленин пааматынньыга киин болуоссакка миэстэтигэр төннөрүллүөҕүн эттэ.

Бу туһунан Дьокуускай куорат уокуруктааҕы дьаһалтатын пресс-сулууспата иһитиннэрэр.

Маны таһынан Е.Григорьев киин куорат 2032 сылга диэри сайдыытын былаанын туһунан кэпсээтэ. Оттон Мэдиссиинэ киинин үлэһиттэрэ сайдыы былааныгар балыыһа тас территориятын кэҥэтиини туруорустулар.