Аммаҕа саҥа поликлиника тутулла турар

Амма с. кыраапык быһыытынан симиэнэҕэ 200  киһи сылдьар поликлиникатын тутуу салҕанар. Бу доруобуйа харыстабылын бастакы сүһүөх звенотун саҥардан оҥоруу бырагырааматын иитинэн ыытыллар.

Үлэ 2024 с. кыһын саҕаламмыта. Бу кэм устатыгар таас куорпус тутулунна.

—Билигин 62 исписэлиис эбийиэккэ үлэлиир. Ис өттүгэр истиэнэтин сыбыыллар, дьиэ кырыыһатын оҥороллор. Түннүктэр туруоруллубуттар. Түмүккэ былаһаакканы оҥоруохтара, — диэн этэр Амма улууһун киин балыыһатын кылаабынай бырааһын солбуйааччы Дмитрий Васильев.

Эбийиэги 2025 сыл бүтүүтүгэр туттарыахтаахтар. Саҥа дьиэ наадалаах тэрилинэн, миэбэлинэн хааччыллыа.

—Саҥа поликлиника тутуллан бүтэ охсорун тулуйбакка-тэһийбэккэ күүтэбит. РФ Бэрэсидьиэнэ В.Путин көҕүлээбит национальнай бырайыагынан,  Аммабытыгар былырыыҥҥыттан саҥа поликлиника тутуута саҕаламмыта. Билигин стационарнай комплекс поликлиникаттан балачча ыраах баара саастаах дьоҥҥо табыгаһа суох. Саҥа поликлиника үлэҕэ киирдэҕинэ, барыта чугас-чугас буолуоҕа. Билигин дьон доруобуйатыгар улахан болҕомто ууруллар буолбута олус үөрүүлээх, — диэн Амма сэлиэнньэтин олохтооҕо Анастасия Сутакова санаатын үллэстэр.

Санатан эттэххэ, Саха сиригэр «Уһун уонна көхтөөх олох» национальнай бырайыагынан кэнники сылларга бу салааны саҥардыы үлэтэ балачча ыытылынна:  Чурапчыга, Ытык Күөлгэ, Хонууга, Уус Маайаҕа уо.д.а. улуустарга улахан мэдиссиинэ эбийиэктэрэ тутулуннулар. Амма улууһугар саҥа поликлиника улуус олохтоохторугар мэдиссиинэ көмөтүн саҥа таһымҥа таһаарыа.

Сиһилии: https://minzdrav.sakha.gov.ru/news/8384

СӨ доруобуйа харыстабылын министитэристибэтин саайтыттан