Аммаҕа социальнай үлэһит кыыс биэнсийэлээх дьахтартан 640 тыһ.солк. уорууга уорбаланар

Амма оройуоннааҕы ИДьМ холуобунай ирдэбил үлэһиттэрэ 76 саастаах биэнсийэлээх дьахтартан 640 тыһ.солк. уорууга уорбаланар 25 саастаах социальнай үлэһит кыыһы туттулар. Бу туһунан МВД Медиа саайт суруйар.

Барыллаан быһаарбыттарынан, социальнай үлэһит кыыс аҕам саастаах дьахтары көрө-истэ сылдьан, төлөпүөн сыһыарыытын туһанан ый устата харчы уора сылдьыбыт. Биэнсийэлээх дьахтар төлөпүөнүн паролун кыыска этэн, сыһыарыы көмөтүнэн хомунаалынай өҥөлөрүн төлөттөрөр эбит. Социальнай үлэһит ону туһанан бэйэтин счетугар харчы ыыталаабыт.

Ый буолан баран дьахтар дьүөгэтэ тугу эрэ уорбалыы санаабыт, счету бэрэбиэркэлээбиттэрэ, харчыта суох буолбут. Онон полицияҕа үҥсүбүттэр.

Социальнай үлэһит уорбут харчытын бэйэтин наадаларыгар бараабыт.

Холуобунай дьыала тэрилиннэ.